U prishet kamioni në shkretëtirën e Saharasë, 49 persona humbin jetën nga etja

Të paktën 49 persona kanë humbur jetën në një zonë të largët të shkretëtirës së Saharasë në veri të Nigerit, pasi kamioni me të cilin udhëtonin u prish dhe ata mbetën të bllokuar për ditë të tëra pa ujë, njoftuan autoritetet lokale.

Sipas guvernatorit të rajonit të Agadezit, grupi po kthehej nga Mali, ku kishte marrë pjesë në një festival mysliman, kur automjeti i tyre doli nga itinerari i planifikuar dhe u bllokua rreth 80 kilometra në perëndim të pikës kufitare të Assamakës, në kufirin mes Nigerit dhe Algjerisë.

Autoritetet thanë se udhëtarët, të privuar nga uji dhe të paaftë për të riparuar kamionin pavarësisht përpjekjeve të shoferit dhe pasagjerëve, mbetën të izoluar në kushte ekstreme, me temperatura të larta dhe pa asnjë mundësi furnizimi.

Vetëm dy persona arritën të mbijetonin. Ata ecën përmes shkretëtirës deri në Assamakë, ku njoftuan autoritetet për tragjedinë.

Ekipet e shpëtimit të dërguara në vendngjarje gjetën dhjetëra trupa të pajetë nën kamionin e bllokuar dhe në zonën përreth. Viktimat u varrosën më pas në varre masive nga autoritetet lokale.

Sipas hetimeve paraprake, kamioni kishte nisur udhëtimin nga qyteti malian i Telhandekut, por kishte devijuar nga rruga e parashikuar. Për disa ditë, shoferi dhe pasagjerët u përpoqën ta riparonin automjetin, por pa sukses.

Ndërkohë, gjatë kthimit nga operacioni i kërkim-shpëtimit, ekipet e emergjencës zbuluan një tjetër kamion të prishur me më shumë se 60 persona në bord.

Ata kishin mbetur të bllokuar për tre ditë pas një defekti në baterinë e mjetit. Forcat e sigurisë dhe ekipet e shpëtimit u shpërndanë ujë udhëtarëve të rraskapitur dhe ndihmuan në riparimin e automjetit, duke u mundësuar vazhdimin e udhëtimit.