Alarm për hantavirusin në Itali, i riu në izolim pas kontaktit me pasagjeren që humbi jetën

Shqetësimet rreth përhapjes ndërkombëtare të hantavirusit u thelluan sot kur agjencia italiane e lajmeve ANSA raportoi se një italian 25-vjeçar nga rajoni jugor i Kalabrisë dyshohet se ka kontraktuar hantavirusin dhe po transferohet në spitalin infektiv Spallanzani të Romës për testim. I riu kishte qenë vendosur në karantinë pasi kishte udhëtuar në një fluturim KLM holandez pranë gruas që vdiq më pas nga infeksioni me hantavirus.

Nëse rasti konfirmohet pozitiv, bëhet fjala për një rast potencialisht të "brezit të tretë" të transmetimit, domethënë virusin e marrë nga dikush i cili e mori nga dikush tjetër, gjë që do të tregonte aftësi të shtuar të virusit për t'u përcjellë nga njeriu tek njeriu.

Si filloi gjithçka  

Më 2 maj 2026, OBSH-ja u njoftua për një grup rastesh të sëmundjes akute respiratore ndër pasagjerët dhe ekuipazhin e një anijeje turistike në Oqeanin Atlantik. Anija u nis nga Ushuaia, Argjentinë, më 1 prill 2026, dhe udhëtoi nëpër Atlantikun e Jugut, duke ndaluar në Antarktidë, Ishullin Georgia Jugore, Tristan da Cunha, Shën Helena dhe Ishullin Ascension. CDC

Deri më 8 maj, janë raportuar gjithsej tetë raste, gjashtë të konfirmuara dhe dy të dyshuara, duke përfshirë tre vdekje, me shkallë fataliteti prej 38%. Të gjitha rastet e identifikuara janë konfirmuar si virusin Andes (ANDV). 

Varianti më rrezikshëm

Virusi Andes është i vetmi lloj i hantavirusit për të cilin është dokumentuar transmetimi nga njeriu tek njeriu. Ky lloj mund të shkaktojë simptoma shumë të rënda, temperaturë të lartë, probleme me frymëmarrjen dhe komplikime të rënda kardiopulmonare. Deri në 30–50% e të infektuarve mund të vdesin nga virusi.

Shpërndarja ndërkombëtare

Gruaja holandeze 69-vjeçare kishte kaluar një kohë të shkurtër brenda një avioni KLM në Johanesburg, Afrikën e Jugut, para se të dërgohej në spital ku vdiq të nesërmen. Gruaja, bashkëshorti i saj 70-vjeçar holandez dhe një grua gjermane kanë vdekur nga shpërthimi.

Fluturimi i lidhur ishte KL592 (kodsharimi AF8282, DL9560, SK6855), i cili u nis nga Johanesburg për Amsterdam më 25 prill 2026 në orën 23:15 me orën lokale.

Ministria italiane e Shëndetësisë aktivizoi më 9 maj 2026 masa "survejimi aktiv" për katër udhëtarë që kishin transituar në aeroportin Fiumicino të Romës pasi kishin ndarë një segment të fluturimit KLM me pasagjeren e konfirmuar si rast hantavirusi. Autoritetet italiane morën të dhënat e kontaktit për katër pasagjerët, të vendosur në Kalabri, Kampania, Toskana dhe Veneto, dhe urdhëruan njësitë rajonale shëndetësore t'i monitorojnë ata për gjashtë javë, periudhën maksimale të inkubacionit të njohur të virusit.

OBSH-ja ka këmbëngulur se shpërthimi i hantavirusit mbi anijen turistike nuk shënon fillimin e një krize të ngjashme me COVID-19. "Kjo nuk është fillimi i një epidemie. Kjo nuk është fillimi i një pandemie," deklaroi drejtoresha e OBSH-së për gatishmërinë ndaj epidemive, Maria Van Kerkhove. OBSH-ja beson se shpërthimi do të mbetet "i kufizuar", me kusht që të zbatohen masat e shëndetit publik.

Stjuardesa e KLM-së që u shtrua me simptoma të dyshimta doli negative për hantavirusin, sipas OBSH-së. Ndërkohë, një spanjoll i cili doli pozitiv për hantavirusin pas evakuimit nga anija po shfaq simptoma, ndërsa një spital ushtarak në Madrid ka karantinuar 14 spanjollë të evakuuar nga anija, me vetëm njërin prej tyre që doli pozitiv.  

Autoritetet shëndetësore në mbarë Europën dhe SHBA-në vazhdojnë gjurmimin e kontakteve ndërkombëtare, ndërsa rasti italian i sotëm mbetet ende nën hetim.