Irani paraqiti qëndrimet dhe kërkesat e tij në lidhje me propozimet amerikane për armëpushimin që mori nëpërmjet ndërmjetësve, tha zëdhënësi i Ministrisë së Punëve të Jashtme të Iranit, Esmail Baghei, duke theksuar njëkohësisht se negociatat janë "të papajtueshme me ultimatumet dhe kërcënimet për të kryer krime lufte".

Baghei tha se Teherani ka bërë kërkesa në përputhje me interesat e tij kombëtare dhe se ato tashmë janë përcjellë përmes kanaleve ndërmjetëse, pa dhënë detaje, raporton Reuters. Kërkesat e mëparshme nga Shtetet e Bashkuara të Amerikës , siç është plani 15-pikësh, u refuzuan si "të tepërta", shtoi zëdhënësi i Ministrisë së Punëve të Jashtme iraniane.

"Irani nuk ngurron të shprehë qartë ato që i konsideron kërkesat e tij legjitime dhe kjo nuk duhet interpretuar si një shenjë kompromisi, por si një pasqyrim i besimit të tij në mbrojtjen e pozicioneve të tij", tha Baghei në një konferencë për shtyp.

Ai shtoi se Irani i ka "formuluar përgjigjet e tij" dhe do t'i shpallë ato kur të vijë koha e duhur.

Presidenti i SHBA-së, Donald Trump, përsëriti gjatë fundjavës së kaluar se Irani ka afat deri të martën në mbrëmje sipas kohës lindore për të hapur plotësisht Ngushticën e Hormuzit, përndryshe do të përballet me shkatërrimin e termocentraleve dhe urave.

Në të njëjtën kohë, Trump la të kuptohej mundësia e arritjes së një marrëveshjeje sot për ndërprerjen e armiqësive, të cilat filluan më 28 shkurt me sulmet amerikano-izraelite ndaj Iranit.