Ministri rumun i Mbrojtjes, Radu Miruta, bisedoi me zëvendësministrin ukrainas të Mbrojtjes për Integrimin Evropian, Serhiy Boyev, rreth mundësisë që të dy vendet të bashkëpunojnë në zhvillimin e mjeteve ajrore pa pilot.

Sipas një deklarate nga Ministria e Mbrojtjes e Rumanisë, të dy zyrtarët u përqendruan në eksplorimin e mundësive për bashkëpunim të ardhshëm midis ministrive të mbrojtjes të Rumanisë dhe Ukrainës në kontekstin e Partneritetit Strategjik të nënshkruar së fundmi nga presidentët e të dy vendeve dhe zbatimin e programit financiar të mbrojtjes të BE-së SAFE.

Në takimin e djeshëm në Bukuresht, zyrtarët diskutuan zhvillimin e përbashkët të dronëve , si dhe mundësitë për transferimin e teknologjisë, raportoi sot agjencia rumune Agerpres.

Ministri rumun tha se projekti do të ketë mbështetje financiare prej 200 milionë eurosh nga programi SAFE dhe se Rumania dëshiron që ministria të jetë një lojtar qendror në këtë bashkëpunim dhe jo vetëm një përfituese."Kjo është arsyeja pse po diskutojmë aktualisht se si të formojmë një ekip të posaçëm që do të punojë ekskluzivisht në këtë projekt dhe kontrata pritet të nënshkruhet deri në fund të majit", tha Miruta.

Ai tha se Rumania do të përfitonte nga përvoja e Ukrainës në fushën e betejës, si dhe nga qasja në njerëz dhe infrastrukturë të aftë për të prodhuar pajisje të teknologjisë së fundit.

“Do të jetë gjithashtu një avantazh për Ukrainën sepse Rumania, si pjesëmarrëse në projektin SAFE, do të mbështesë financimin e prodhimit të dronëve”, tha ministri rumun.

Siç raportohet nga agjencia Agrepress, takimet e ekspertëve dhe kompanive rumunë dhe ukrainasë në fushën e mjeteve ajrore pa pilot do të vazhdojnë në ditët në vijim, duke përfshirë 15 kompani ukrainase që do të paraqesin portofolet dhe aftësitë e tyre teknike.