Presidenti amerikan, Donald Trump, ka zbuluar planet për ndërtimin e një kompleksi të madh ushtarak nën sallën e re të ballove që pritet të ndërtohet në Shtëpinë e Bardhë.

Deklarata u bë të dielën, teksa Trump ndodhej në bordin e Air Force One, ku u prezantoi gazetarëve edhe imazhe nga projekti. Ai vlerësoi veçoritë e sigurisë së ndërtesës, duke theksuar se ajo do të pajiset me xhama antiplumb dhe një çati rezistente ndaj sulmeve me dronë.

Sipas tij, kompleksi ushtarak tashmë është në ndërtim e sipër dhe ekzistenca e tij u bë publike pas një padie gjyqësore, të cilën presidenti e cilësoi si “të pakuptimtë”. Trump shtoi se salla e ballove do të shërbejë si një mbulesë mbrojtëse për strukturën poshtë saj, duke ofruar mbrojtje nga kërcënime të ndryshme, përfshirë dronët.

Salla e re, me një sipërfaqe prej rreth 8,360 metrash katrorë, dhe do të zëvendësojë Krahun Lindor, i cili u shemb në tetor të vitit 2025 me urdhër të Trump. Nën këtë pjesë ndodhej më parë  Qendra Presidenciale e Operacioneve të Emergjencave, një bunker i përdorur në raste emergjencash.

Projekti ka shkaktuar reagime nga ligjvënës, historianë dhe organizata për mbrojtjen e trashëgimisë kulturore. Kritikët kundërshtojnë shembjen e ndërtesës ekzistuese pa një vlerësim federal paraprak dhe pa konsultim publik, ndërsa ngrenë shqetësime edhe për përmasat dhe ndikimin estetik të ndërtimit të ri.

Ndërkohë, Komisioni Kombëtar i Planifikimit të Kapitalit, një nga institucionet që duhet të miratojë projektin, pritet të votojë për ndryshimet e propozuara të enjten.

Sipas planit, salla e re do të ketë kapacitet për deri në 1,000 persona, ndërsa kostoja totale e projektit vlerësohet të arrijë në 250 milionë dollarë. Presidenti theksoi se ambienti do të përdoret për darka zyrtare në nder të liderëve të huaj dhe aktivitete të tjera të nivelit të lartë.