Që kur Fidel Kastro mori pushtetin në vitin 1959, regjimi komunist i Kubës ka përballuar tentativa për atentate nga CIA, bllokada amerikane dhe madje edhe një pushtim të mbështetur nga SHBA.

Familja Kastro vazhdon ta kontrollojë Kubën edhe pas më shumë se gjashtë dekadash, por kontrolli i tyre po dobësohet.

Ky mund të jetë momenti kur SHBA arrin të zhdukë atë që e konsideron si një shqetësim komunist shumë pranë saj. Dhe mund të jetë nipi i madh i familjes Kastro që e bën të mundur këtë.

Si nip i udhëheqësit real të Kubës, RaulKastro, disa e quajnë Raul Guillermo Rodríguez Kastro"Raulito" ose "Rauli i vogël".

Të tjerë e quajnë "El Cangrejo" – "Gaforrja", një nofkë përçmuese për një person kaq të fuqishëm, që lidhet me faktin se ai ka lindur me gjashtë gishta në njërën dorë.

Por tani 41-vjeçari po del në skenë si një figurë e rëndësishme më vete. Ndërsa regjimi po lëkundet drejt rënies për shkak të presionit të madh të SHBA-së mbi importet e naftës, administrata e Donald Trump-it ka hapur bisedime me të.

"Ata po kërkojnë Delcy-n e radhës në Kubë," tha një burim, duke iu referuar Delcy Rodríguez-it, udhëheqëses së Venezuelës të miratuar nga Trump, e cila mori pushtetin pasi Nicolás Maduro u arrestua.

Marco Rubio, sekretari amerikan i shtetit, thuhet se ka hapur kanale komunikimi të fshehta me RodriguezKastron.

Zyrtarë amerikanë thuhet gjithashtu se janë takuar me të gjatë një konference të Komunitetit të Karaibeve në St Kits dhe Nevis në fund të shkurtit.

Media kubane tani e quan "Gaforrja që ecën përpara".

Ky Kastro i brezit të tretë po shihet si njeriu që mund t'i japë fund përplasjes së gjatë mes familjes së tij dhe SHBA-së dhe ndoshta edhe vetë dinastisë Kastro.

Rodriguez Kastro është djali i vajzës së madhe të RaulKastros, Débora Kastro Espín, dhe i Luis Alberto Rodriguez López-Callejas, drejtues i një grupi të madh ushtarak në Kubë.

Sipas një kushëriri, ai ndoqi shkollë ushtarake dhe më pas studioi kontabilitet dhe financë në Universitetin e Havanës.

Thuhet se ai u zhvendos për të jetuar me Raulin që në moshën 11-vjeçare dhe lidhja e tyre e ngushtë vazhdon edhe sot. Kur gjyshi i tij u bë president në vitin 2008, ai ishte gjithmonë pranë tij, duke shërbyer praktikisht si truprojë.

Në shumë fotografi të ish-presidentit, ai shihet në sfond, pranë tij.

Në vitin 2016, ai u emërua zyrtarisht në krye të një strukture sigurie që mbron liderët e Kubës.

Përveç kësaj, ai ka lidhje të forta me ushtrinë, mendohet se zotëron disa klube nate në Havanë dhe është pjesë e jetës së natës në ishull.

Në vitin 2023, një grua pretendoi në media se ai e kishte aksidentuar me makinë ndërsa ajo po drejtonte një karrocë me kalë, duke e lënë të paaftë për të ecur. I njëjti raport thoshte se ai njihej për një jetë luksi dhe shfrenimi.

Rodriguez Kastro përfaqëson një klasë të re oligarkësh

Një studiues politik kubano-venezuelas tha se ai, ashtu si pasardhësit e familjeve të tjera në pushtet, përfaqëson një klasë të re të pasurish.

"Ata janë pasuruar duke shfrytëzuar fondet publike," tha ai. "Nëse ngjajnë me dikë, janë si oligarkët rusë, pasardhës të liderëve të vjetër komunistë."

Kritikët thonë se ai është mësuar me përdorimin e drejtpërdrejtë të pushtetit, por nuk është shumë i aftë politikisht. Roli i tij i madh vjen sepse ai kontrollon aksesin tek gjyshi i tij 94-vjeçar.

"Ai është një njeri i madh që është mësuar me pushtet të pakufizuar," tha një aktivist. "Nuk është shumë i mprehtë."

Tani që kontrolli i familjes Kastro po dobësohet, "Gaforrja" ka dalë në plan të parë.

Shumë kubanezë besojnë se regjimi është më afër rënies se kurrë më parë, ndërsa po përballet me presionin e SHBA dhe mungesën e naftës së lirë nga Venezuela.

Protestat po shtohen, mbeturinat po grumbullohen në rrugë dhe ndërprerjet e energjisë janë të shpeshta.

Gjithashtu, Trump ka treguar se është i gatshëm të përdorë forcë në Amerikën e Jugut, duke dërguar forca speciale për të kapur Nicolas Maduron në janar. Sipas tij, "E ka radhën Kuba".

Por Rubio e sheh 41-vjeçarin si përfaqësues të një brezi të ri kubanezësh që besojnë se komunizmi ka dështuar.

Si nipi i preferuar i RaulKastros, ai ka besimin e njeriut që konsiderohet si lideri i vërtetë i Kubës.

Në mars, ai u shfaq në dy aktivitete publike së bashku me presidentin Miguel Díaz-Canel, i cili shihet nga shumë si një figurë formale.

Nuk është e qartë se si ai u bë pjesë e bisedimeve që mund të vendosin fatin e Kubës. Disa mendojnë se ishte vetë RaulKastro që e propozoi si një kanal komunikimi të besueshëm.

Një mik i tij u ndalua nga autoritetet amerikane në vitin 2025, gjë që ngre dyshime se mund të jetë përdorur për të dërguar mesazhe.

"Liderët e Kubës duan marrëveshje"

Një zyrtar i Shtëpisë së Bardhë tha se Kuba është "një vend në dështim që ka humbur mbështetjen e Venezuelës".

"Po flasim me Kubën, liderët e së cilës duan të bëjnë një marrëveshje dhe duhet ta bëjnë," tha ai.

Një analist politik beson se Rodriguez mund të balancojë kërkesat e regjimit dhe SHBA-së, ndërsa Amerika kërkon ta kthejë Kubën në një shtet të varur.

"Amerikanët e dinë që kanë avantazh dhe se situata aktuale mund të çojë edhe në ndërhyrje ushtarake," tha ai. "Kubanezët do negociojnë për të mbijetuar."

Të tjerë janë më skeptikë.

Një aktivist kubanez për të drejtat e njeriut, i arrestuar shumë herë nga regjimi, u lirua nga burgu në tetor me kërkesë të SHBA-së dhe tani jeton në mërgim në Miami.

Ai tha se qëllimi i SHBA-së është "të rrëzojë regjimin" dhe beson se kjo mund të kërkojë edhe ndërhyrje ushtarake, pasi liderët kubanezë përpiqen të mbajnë pushtetin.

Kanal i përshtatshëm

Arcos beson se Rodriguez është thjesht një kanal i përshtatshëm komunikimi me Raulin, i cili mbetet autoriteti kryesor në ishull.

"Ai nuk mund të jetë si Delcy Rodriguez," tha ai. "Nuk është i përshtatshëm për të qenë figurë kalimtare. Nuk është politikan. Nuk është as teknokrat. Është një njeri i dhunshëm."

Znj. Rodriguez, presidente e zgjedhur e Venezuelës që nga janari, ka vepruar me shumë kujdes që kur mori pushtetin.

Ajo ka arritur të afrohet me Trump-in, i cili flet për të me një lloj simpatie, dhe njëkohësisht ka ruajtur mbështetjen e familjeve të fuqishme venezuelase, të cilat mund të kthehen kundër saj nëse duket se po e bën vendin të varur.

Por Venezuela nuk është si Kuba, ku sistemi i pushtetit është më i mbyllur dhe më i ndërlikuar, duke e bërë të vështirë për Rubion të gjejë dhe të mbështesë një lider të ri.

Alonso theksoi se RodriguezKastro nuk ka një rol zyrtar në strukturat kryesore të pushtetit në ishull: as te liderët historikë si RaulKastro, as te figurat publike si Díaz-Canel apo te Gaesa.

Nëse Uashingtoni arrin të përdorë një Kastro për ta shkëputur Kubën nga komunizmi, kjo do të ishte një fitore e madhe pas shumë vitesh përplasjeje.

Por nëse basti mbi "Gaforren" dështon dhe regjimi nuk ndryshon, atëherë rreziku i një ndërhyrjeje tjetër ushtarake mbetet./The Telegraph – Syri.net