Ministri i Jashtëm pakistanez, Ishaq Dar, tha se bisedimet midis Shteteve të Bashkuara dhe Iranit mund të zhvillohen në Islamabad në ditët në vijim.

"Pakistani do të jetë i nderuar të presë dhe të lehtësojë bisedime kuptimplote midis dy palëve në ditët në vijim për një zgjidhje gjithëpërfshirëse dhe të qëndrueshme të konfliktit të vazhdueshëm", tha ai në një konferencë për shtyp pas konsultimeve me diplomatët më të lartë të Egjiptit, Turqisë dhe Arabisë Saudite. "Pakistani është shumë i lumtur që si Irani ashtu edhe SHBA-të, kanë shprehur besimin e tyre tek Pakistani për të lehtësuar bisedimet", shtoi Dar.

Ai theksoi se "Kina mbështet plotësisht iniciativën e Pakistanit për të pritur bisedimet Iran-SHBA", dhe se Sekretari i Përgjithshëm i OKB-së, Antonio Guterres, "ka shprehur mbështetjen e tij të plotë për iniciativën e paqes të ndërmarrë nga Pakistani".

Sipas Dar, në konsultimet e së dielës u diskutuan "mënyrat për t'i dhënë fund luftës në rajon herët dhe përgjithmonë". Ministrat e jashtëm të Pakistanit, Egjiptit, Turqisë dhe Arabisë Saudite "ranë dakord se kjo luftë nuk është në favor të askujt dhe do të çonte vetëm në vdekje dhe shkatërrim".

Shtetet e Bashkuara dhe Izraeli nisën një operacion ushtarak kundër Iranit më 28 shkurt. Qytete të mëdha iraniane, përfshirë Teheranin, u goditën. Shtëpia e Bardhë e justifikoi sulmin duke përmendur kërcënime të dyshuara me raketa dhe bërthamore nga Irani.

Trupat e Gardës Revolucionare Islamike njoftoi një operacion hakmarrës, duke synuar vende në Izrael. Bazat ushtarake amerikane në Bahrein, Jordani, Kuvajt, Katar, Arabi Saudite dhe Emiratet e Bashkuara Arabe u goditën gjithashtu./ Tass.