Sekretari amerikan i Shtetit, Marco Rubio, e cilësoi të dielën si “shqetësues” raportin e pesë aleatëve evropianë, të cilët fajësojnë Rusinë për vrasjen e kritikut të ndjerë të Kremlinit, Alexei Navalny, përmes përdorimit të një toksine të nxjerrë nga bretkosat helmuese.

Ai shtoi se Uashingtoni nuk ka arsye ta vërë në dyshim këtë vlerësim.

“Ne jemi plotësisht në dijeni të raportit. Ai është shqetësues. Jemi të informuar për rastin e z. Navalny dhe, sigurisht, nuk kemi asnjë arsye për ta vënë në dyshim,” deklaroi Rubio para gazetarëve gjatë një konference për shtyp në Bratislava, në kuadër të një vizite zyrtare në Slovakia.

Në një deklaratë të përbashkët, Britania, Franca, Gjermania, Suedia dhe Holanda njoftuan të shtunën se analizat e mostrave të marra nga trupi i Navalny-t konfirmuan “në mënyrë përfundimtare” praninë e epibatidinës — një toksinë që gjendet te bretkosat helmuese të Amerikës së Jugut dhe që nuk ndodhet natyrshëm në Rusi.

Qeveria ruse, e cila ka mohuar vazhdimisht çdo përgjegjësi për vdekjen e Navalny-t, ndërkohë që ai mbahej në një burg në Arktik dy vjet më parë, i hodhi poshtë akuzat e fundit duke i cilësuar si “një mashtrim të propagandës perëndimore”, sipas agjencisë shtetërore ruse të lajmeve TASS.

I pyetur pse Shtetet e Bashkuara nuk iu bashkuan deklaratës së përbashkët, Rubio theksoi se nisma kishte qenë e vetë vendeve evropiane.

“Këto vende arritën në atë përfundim dhe e koordinuan vetë deklaratën. Kjo nuk do të thotë se ne nuk pajtohemi me përfundimin e tyre. Thjesht, nuk ishte një nismë e jona. Ndonjëherë shtetet dalin me qëndrime të bazuara në informacionin dhe inteligjencën që kanë mbledhur vetë,” u shpreh ai.

“Ne nuk po e kundërshtojmë dhe as nuk po hyjmë në ndonjë debat me këto vende për këtë çështje. Ishte raporti i tyre dhe ata e publikuan,” përfundoi Rubio./reuters