Rreth 4.5 milionë vajza në mbarë botën janë në rrezik të gjymtimit gjenital femëror (FGM) këtë vit, kanë paralajmëruar agjencitë e OKB-së.

Organizata Botërore e Shëndetësisë (OBSH) dhe agjencia e OKB-së për fëmijët, UNICEF, e dënuan praktikën, ndërsa shënoi Ditën Ndërkombëtare të Tolerancës Zero për Gjymtimin Gjenital Femëror të premten.

Procedura përfshin heqjen e pjesshme ose të plotë të organeve gjenitale të jashtme femërore, ndonjëherë tek fëmijët nën moshën 5 vjeç.

Në vendet anembanë Afrikës, Azisë dhe Lindjes së Mesme ku praktikohet, shpesh justifikohet në bazë të traditës ose fesë, me pretendimet se siguron virgjërinë e vajzave.

Në realitet, ndërhyrja shpesh çon në ndërlikime të rënda shëndetësore që zgjasin gjatë gjithë jetës. Rreth 230 milionë vajza dhe gra në mbarë botën, jetojnë me pasojat e gjymtimit gjenital, thanë agjencitë.

Përpjekjet për edukim dhe ndërgjegjësim kanë ndihmuar në uljen e kësaj praktike që nga viti 1990, thanë OBSH-ja dhe UNICEF-i. Në atë kohë, një në dy vajza në vendet e prekura i nënshtrohej procedurës; sot, shifra është rreth një në tre.

Megjithatë, agjencitë paralajmëruan se shkurtimet në fondet e ndihmës dhe përpjekjet sistematike për të ndaluar luftën kundër kësaj praktike - ose për ta etiketuar atë si "të sigurt" kur kryhet nga profesionistë mjekësorë - po e bëjnë punën më të vështirë./ DPA News.