Nga Anders Hagstrom, FOX NEWS

Administrata e presidentit Donald Trump nisi një hetim pasi agjitatorë kundër ICE (Agjencia për Doganat dhe Emigracionin) hynë me forcë në një kishë në Minneapolis gjatë një shërbese të dielën.

Dhjetëra agjitatorë shpërthyen brenda në sallën e kishës rreth gjysmës së shërbesës, thanë për Fox News Digital pjesëmarrës të kishës.

Turma hyri në ndërtesë me bindjen se një nga pastorët ishte drejtori në detyrë i zyrës së ICE në St. Paul.

Zyrtarë të nivelit të lartë të administratës Trump u zotuan për një hetim pas trazirave të së dielës.

“Sapo fola me pastorin në Minesota, kisha e të cilit u vu në shënjestër. Sulmet kundër zbatuesve të ligjit dhe frikësimi i të krishterëve do të përballen me gjithë forcën e ligjit federal,” tha Prokurorja e Përgjithshme, Pam Bondi, në një deklaratë.

“Nëse udhëheqësit shtetërorë refuzojnë të veprojnë me përgjegjësi për të parandaluar paligjshmërinë, Departamenti i Drejtësisë do të mbetet i mobilizuar për të ndjekur penalisht krimet federale dhe për të siguruar që sundimi i ligjit të mbizotërojë,” shtoi ajo.

NOW :: ICE protesters storm church service in Minneapolis pic.twitter.com/qC2Eelw50g

— Culture War Report (@CultureWar2020) January 18, 2026

Sekretarja për shtyp e Shtëpisë së Bardhë, Karoline Leavitt, e dënoi gjithashtu sulmin në një deklaratë në rrjetet sociale. Pamjet nga ngjarja treguan një turmë që ndërpriste shërbesën fetare me thirrje. Të pranishmit në kishë i thanë Fox se agjitatorët i ndoqën deri në parking ndërsa ata përpiqeshin të largoheshin, duke rrethuar disa automjete dhe duke tentuar t’i pengonin të largoheshin.

“Presidenti Trump nuk do të tolerojë frikësimin dhe ngacmimin e të krishterëve në vendet e tyre të shenjta të adhurimit,” tha Leavitt.

“Ajo që ndodhi më herët në një kishë në Minesota është një incident i neveritshëm dhe Departamenti i Drejtësisë ka nisur një hetim të plotë,” vazhdoi ajo.

Harmeet Dhillon, ndihmës-prokurore e përgjithshme për të drejtat civile, tha se ajo dhe ekipi i saj janë “duke punuar intensivisht” për hetimin e incidentit.

“Nuk do të ndalemi derisa të mund të sjellim drejtësi,” tha Dhillon në një deklaratë.

Ndërkohë, kryetari i bashkisë së Minneapolisit, Jacob Frey, ka mbrojtur protestuesit kundër ICE, duke kundërshtuar zyrtarët federalë që i kanë përshkruar demonstratat si të rrezikshme ose të paligjshme dhe duke hedhur poshtë pretendimet se udhëheqësit shtetërorë dhe lokalë janë përgjegjës për nxitjen e trazirave.

Duke u shfaqur të dielën në emisionin “Face the Nation” të CBS-it, Frey hodhi poshtë karakterizimin e administratës Trump për goditjen ndaj emigracionit në Minesota, duke argumentuar se rritja e pranisë së agjentëve federalë i ka bërë banorët të ndihen të vënë në shënjestër, jo të mbrojtur.

“Kjo nuk ka të bëjë me sigurinë. Kjo ka të bëjë me ardhjen në qytetin tonë me mijëra dhe terrorizimin e njerëzve thjesht sepse janë latinë ose somalezë,” tha Frey. “Njerëzit në Minneapolis po flasin. Po flasin paqësisht. Po mbrojnë fqinjët e tyre. Dhe kjo nuk ka të bëjë vetëm me rezistencën ndaj Trumpit. Kjo ka të bëjë me dashurinë dhe kujdesin për njerëzit që e quajnë këtë qytet shtëpinë e tyre. Dhe ka qenë frymëzuese.”