Irani paralajmëron: Sulmi ndaj Khameneit do të ishte shpallje lufte

Presidenti i Iranit, Masoud Pezeshkian, paralajmëroi të dielën se çdo sulm ndaj udhëheqësit suprem Ajatollah Ali Khamenei do të konsiderohej një shpallje lufte ndaj Iranit.

Deklarata erdhi në përgjigje të spekulimeve se presidenti amerikan Donald Trump po shqyrtonte mundësinë e eliminimit ose rrëzimit të Khameneit. Në një postim në rrjetin social X, Pezeshkian shkroi se “një sulm ndaj udhëheqësit të madh të vendit tonë është i barabartë me një luftë në shkallë të plotë me kombin iranian”.

Presidenti iranian fajësoi gjithashtu Shtetet e Bashkuara për protestat që kanë tronditur vendin gjatë dy javëve të fundit, të cilat, sipas autoriteteve, kanë sjellë mijëra viktima mes demonstruesve. “Nëse ka vështirësi dhe kufizime në jetën e popullit të dashur të Iranit, një nga shkaqet kryesore është armiqësia e gjatë dhe sanksionet çnjerëzore të vendosura nga qeveria amerikane dhe aleatët e saj”, tha Pezeshkian, shkruan The Guardian.

Nga ana tjetër, Donald Trump, në një intervistë për Politico, bëri thirrje për t’i dhënë fund sundimit gati 40-vjeçar të Khameneit, duke e quajtur atë “një njeri të sëmurë” dhe duke e akuzuar për dhunë ndaj popullit të vet.

Protestat në Iran shpërthyen më 28 dhjetor, fillimisht si reagim ndaj inflacionit të lartë, rënies së monedhës dhe vështirësive ekonomike, për t’u shndërruar më pas në demonstrata të gjera antiqeveritare që kërkonin ndryshimin e regjimit. Si kundërpërgjigje, autoritetet iraniane më 8 janar ndërprenë pothuajse plotësisht shërbimet e internetit dhe telefonisë, duke izoluar vendin nga bota e jashtme.

Javën e kaluar, Trump u bëri thirrje iranianëve të vazhdojnë protestat dhe të “marrin kontrollin e institucioneve”, duke deklaruar se “ndihma është në rrugë”, ndërsa raportet për një sulm të mundshëm ndaj Iranit u shtuan. Të mërkurën, SHBA-të ishin pranë nisjes së sulmeve ushtarake, por në fund u tërhoqën mes presionit rajonal dhe diplomatik.

Sipas faqes amerikane të lajmeve Axios, kryeministri izraelit Benjamin Netanyahu e kishte paralajmëruar Trump se Izraeli nuk ishte i përgatitur për një hakmarrje iraniane dhe kishte vënë në dyshim efektivitetin e një sulmi amerikan. Edhe princi i kurorës së Arabisë Saudite, Mohammed bin Salman, kishte kërkuar përmbajtje, duke theksuar rreziqet për stabilitetin rajonal.