Kolonët e paligjshëm izraelitë plagosën një foshnjë palestineze dhe shkatërruan dhjetëra pemë ulliri, në një seri sulmesh në Bregun Perëndimor të pushtuar, thanë të enjten një grup për të drejtat e njeriut dhe burime lokale.

Grupi i të drejtave të beduinëve al-Baydar tha se një foshnjë 8-muajshe u plagos dhe u shtrua në spital, pasi kolonët e paligjshëm sulmuan shtëpitë dhe pronat palestineze me gurë të mërkurën vonë në zonën al-Rabia të qytetit Sa'ir, në verilindje të Hebronit në Bregun Perëndimor jugor.

Al-Baydar tha se sulmi shkaktoi dëme të konsiderueshme në shtëpitë dhe pronat palestineze, duke e quajtur sulmin një përshkallëzim të rrezikshëm të sulmeve të kolonëve ndaj civilëve.

Ai i mbajti autoritetet izraelite plotësisht përgjegjëse për shkeljet e përsëritura nga kolonët dhe u bëri thirrje organizatave të të drejtave të njeriut, të ndërhyjnë urgjentisht për të mbrojtur banorët palestinezë dhe për të siguruar llogaridhënie për ata që janë përgjegjës.

Kolonët e paligjshëm gjithashtu shkulën dhjetëra pemë ulliri në qytetin Dayr Balut, në perëndim të Salfit në Bregun Perëndimor qendror.

Sipas agjencisë zyrtare palestineze të lajmeve Wafa, sulmi shkaktoi dëme të shumta në tokën bujqësore dhe në mjetet e jetesës së vendasve në zonë.

Kolonët izraelitë gjithashtu lëruan 4 dynym (rreth 1 akër) tokë të mbjellë me ullinj në qytetin Turmus Ayya, në veri të Ramallahut, thanë burimet lokale.

Sulmi ndodhi një ditë pasi kolonët e paligjshëm lëruan 5 dynymm (1.2 akra) tokë bujqësore në të njëjtin qytet.

Sipas Komisionit të Kolonizimit dhe Rezistencës ndaj Murit, një organ zyrtar, kolonët e paligjshëm izraelitë kryen 621 sulme kundër palestinezëve dhe pronave në Bregun Perëndimor të pushtuar në nëntor.

Forcat izraelite dhe kolonët e paligjshëm kanë vrarë të paktën 1,102 palestinezë në Bregun Perëndimor të pushtuar, përfshirë Jerusalemin Lindor, kanë plagosur gati 11,000 dhe kanë ndaluar rreth 21,000 që nga tetori i vitit 2023, sipas shifrave palestineze.

Në një vendim historik korrikun e kaluar, Gjykata Ndërkombëtare e Drejtësisë e shpalli të paligjshëm pushtimin e territorit palestinez nga Izraeli dhe bëri thirrje për evakuimin e të gjitha vendbanimeve në Bregun Perëndimor dhe në Jerusalemin Lindor./ AA.