Kina i kërkoi të mërkurën SHBA-së të “korrigjojë gabimet e saj”, pasi Uashingtoni njoftoi planet për të rritur tarifat mbi gjysmëpërçuesit kinezë në vitin 2027.

"Kina kundërshton me vendosmëri tarifat gjithëpërfshirëse të palës amerikane dhe pengimin e pabazë të industrive kineze", tha zëdhënësi i Ministrisë së Jashtme Lin Jian gjatë një konference të rregullt për shtyp në Pekin.

Sipas një dokumenti të paraqitur nga përfaqësuesi tregtar i SHBA-së, tarifat për gjysmëpërçuesit e importuar nga Kina do të rriten nga norma aktuale prej 0% duke filluar nga 23 qershori 2027, "në një normë që do të shpallet jo më pak se 30 ditë para asaj date".

“Lëvizje të tilla të Shteteve të Bashkuara prishin një zinxhir të qëndrueshëm global furnizimi dhe industrial, pengojnë zhvillimin e industrisë gjysmëpërçuese të të gjitha vendeve dhe nuk do t’i sjellin dobi askujt”, tha Lin, duke i kërkuar Uashingtonit të “korrigjojë gabimet e tij në një datë të hershme”.

"Nëse SHBA-të vazhdojnë ta zbatojnë këtë masë, Kina do të ndërmarrë veprime të vendosura për të mbrojtur të drejtat dhe interesat e veta legjitime", shtoi ai.

Administrata Trump e ka akuzuar gjithashtu Kinën për përdorimin e praktikave të padrejta tregtare për të provuar të dominojë industrinë globale të çipave, sipas Financial Times.

“Kina ka demonstruar në të kaluarën gatishmërinë e saj për të përdorur varësitë si armë për qëllime shtrëngimi ekonomik”, tha Uashingtoni./ AA.