Numri i falimentimeve në Gjermani ka shënuar një rritje alarmante në tre muajt e parë të vitit 2025, duke arritur nivelin më të lartë të njëmbëdhjetë viteve të fundit. Të dhënat zyrtare dhe analizat e ekspertëve tregojnë se goditjen më të fortë po e marrin bizneset e vogla dhe të mesme, shtylla kryesore e ekonomisë gjermane.

“Stuhia e falimentimeve vazhdon”, deklaroi për Reuters Volker Trier, analist kryesor në Dhomën Gjermane të Tregtisë dhe Industrisë (DIHK), duke theksuar se veçanërisht bizneset e vogla po përballen me vështirësi serioze financiare.

Sipas një ankete të DIHK, pothuajse çdo kompani e tretë me më pak se 20 punonjës frikësohet se gjendja e saj financiare do të përkeqësohet. Këto kompani përbëjnë rreth 85% të të gjitha bizneseve në Gjermani, çka e bën situatën edhe më shqetësuese.

Shifra rekord falimentimesh

Zyra Federale e Statistikave njoftoi se deri në fund të shtatorit 2025, gjykatat gjermane kishin regjistruar 18,125 kërkesa për falimentim, rreth 12% më shumë krahasuar me të njëjtën periudhë të një viti më parë. Ky është numri më i lartë i falimentimeve në vend në 11 vitet e fundit.

Profesor Stephen Miller, drejtues i kërkimit mbi falimentimet në Institutin Leibniz për Kërkime Ekonomike Halle (IWH), konfirmon se rreziku rritet sa më i vogël të jetë biznesi. “Falimentimet ndodhin kryesisht në sektorin e bizneseve të vogla. Mesatarja është rreth 10 punonjës, por shumica janë edhe më të vegjla”, shprehet ai.

Paralelisht, rritje është shënuar edhe në falimentimet personale. Në tre muajt e parë të vitit 2025 u regjistruan 57,824 falimentime konsumatorësh, mbi 8% më shumë se një vit më parë.

Pasojat në tregun e punës

Rritja e falimentimeve po reflektohet edhe në tregun e punës. Sipas IWH, rreth 170,000 vende pune pritet të humbasin gjatë vitit 2025, një shifër dukshëm më e lartë krahasuar me periudhën para pandemisë, kur humbjet ishin nën 100,000 vende pune.

Ekonomisti Klaus Heiner Rehl nga Instituti për Ekonominë Gjermane (IW) në Këln paralajmëron se ndikimi nuk duhet dramatizuar: “Falimentimet kontribuojnë në një rritje të lehtë të papunësisë, por situata nuk është dramatike.”

Ndërsa Stephen Miller ka një vlerësim më pesimist, duke llogaritur se deri në 200,000 vende pune mund të preken këtë vit. Megjithatë, ai thekson se një pjesë e këtyre vendeve do të krijohen sërish në kompani më të forta dhe më konkurruese.

Pse po ndodh kjo?

Sipas ekspertëve, rritja e falimentimeve lidhet kryesisht me dobësinë e vazhdueshme të ekonomisë gjermane gjatë tre viteve të fundit. Faktorë të tillë si çmimet e larta të energjisë, lufta në Ukrainë, pasiguria gjeopolitike, tarifat tregtare, si dhe tranzicioni drejt neutralitetit klimatik, kanë rritur presionin mbi bizneset.

“Arsyet e falimentimit janë gjithmonë individuale,” thekson Miller, duke përmendur edhe gabime menaxheriale, strategji të gabuara produktesh apo konflikte të brendshme si faktorë shtesë.

A ka shpresë për përmirësim?

Shoqata e Praktikuesve dhe Administratorëve të Falimentimit të Gjermanisë (VID) shprehet relativisht optimiste. Kreu i saj, Christoph Nähring, deklaron se pas efekteve të pandemisë, situata po kthehet gradualisht drejt niveleve “normale”, edhe pse ende nuk flitet për një përmbysje të trendit.

Ekonomistët parashikojnë se në vitin 2026 niveli i falimentimeve do të mbetet i lartë, por pa përkeqësime të mëtejshme. Një rreze shprese vjen nga pritshmëritë për rritje ekonomike rreth 1% vitin e ardhshëm, çka mund të lehtësojë presionin mbi bizneset.

Megjithatë, sfidat strukturore – nga konkurrenca globale te kostot e energjisë – mbeten dhe do të vazhdojnë të testojnë qëndrueshmërinë e ekonomisë më të madhe të Europës./ Syri.net