Gjermania rifillon deportimet në Siri pas gati 15 vitesh

Gjermania ka deportuar një kriminel të dënuar në Siri, për herë të parë që kur shpërtheu lufta civile në vend gati 15 vjet më parë, tha Ministria e Brendshme në Berlin.

Siriani iu dorëzua autoriteteve në Damask të martën në mëngjes, tha ministria, duke shtuar se ai kishte vuajtur dënimin me burg për grabitje të rëndë, sulm dhe zhvatje.

Më herët të martën, një burrë afgan i dënuar për dëmtim të qëllimshëm u deportua gjithashtu, duke shënuar deportimin e dytë të tillë brenda një jave, sipas ministrisë.

"Dëbimet në Siri dhe Afganistan duhet të jenë të mundura. Shoqëria jonë ka një interes legjitim për të siguruar që kriminelët të largohen nga vendi ynë", tha Ministri i Brendshëm Alexander Dobrindt, duke premtuar "kontroll, qëndrueshmëri dhe një qëndrim të qartë" mbi migracionin.

Gjermania ndaloi deportimet e drejtpërdrejta në Siri pas shpërthimit të luftës në vitin 2011, pas shtypjes së dhunshme të protestave pro-demokraci nga regjimi i diktatorit të hershëm Bashar al-Assad.

Pasi al-Assad u rrëzua nga një aleancë rebele në fund të vitit të kaluar, në Gjermani u shtuan thirrjet që refugjatët sirianë të ktheheshin në shtëpi. Por qeveria e atëhershme e qendrës së majtë, paralajmëroi se ishte shumë herët për të përcaktuar nëse kushtet në Siri ishin të sigurta.

Qeveria e udhëhequr nga konservatorët e Kancelarit Friedrich Merz, e cila mori detyrën në maj, që atëherë ka miratuar një qëndrim më të ashpër ndaj migracionit, duke u zotuar të rifillojë deportimet në Siri dhe Afganistan duke filluar me kriminelët e dënuar.

Siriani jetoi në Gjermani për 10 vjet

Zyrtarët e qytetit thanë se 37-vjeçari i deportuar në Siri të martën, kishte jetuar më parë në qytetin perëndimor gjerman të Gelsenkirchenit.

Ai hyri në Gjermani në vitin 2015 dhe mori një leje qëndrimi, e cila iu zgjat disa herë, por Zyra Federale për Migracionin dhe Refugjatët më vonë e shfuqizoi statusin e mbrojtjes së burrit, tha qyteti.

Kjo, përveç veprave penale të burrit, bëri që autoritetet lokale të refuzonin një zgjatje të mëtejshme të lejes së tij të qëndrimit dhe t'i kërkonin atij të largohej nga vendi ose përndryshe do të përballej me deportimin në Siri, por ai kurrë nuk e përmbushi kërkesën, thanë zyrtarët e Gelsenkirchen.

Në fund, ai u deportua me një fluturim komercial të martën, mësoi DPA.

Afgani 35-vjeçar i deportuar po atë ditë më parë kishte jetuar në Bavari.

Kjo vjen pasi një afgan 28-vjeçar u deportua në Kabul më 17 dhjetor me një fluturim komercial.

Qeveria e re hap rrugën për deportimet

Që nga rikthimi i talebanëve në pushtet në gusht 2021, Gjermania ka deportuar dy herë grupe shtetasish afganë, me ndihmën e Katarit. Një fluturim i parë u nis në gusht 2024, nën qeverinë e kancelarit Olaf Scholz.

Pas muajsh bisedimesh, zyrtarët e qeverisë gjermane kanë arritur marrëveshje me qeverinë e re të Sirisë, si dhe me regjimin taleban të Afganistanit, për të lehtësuar deportimet e kriminelëve të dënuar dhe individëve që konsiderohen rrezik për sigurinë në mënyrë të rregullt, sipas ministrisë.

Kjo vjen pasi Merz tha në nëntor se ai personalisht do të lobonte tek Presidenti sirian Ahmed al-Sharaa, për një rifillim të shpejtë të deportimeve në Siri.

“Lufta civile në Siri ka mbaruar. Tani nuk ka më asnjë bazë për azil në Gjermani, që do të thotë se mund të fillojmë riatdhesimin”, tha ai më 3 nëntor.

Më vonë ai sqaroi se Gjermania "nuk do të deportojë" ata që përndiqen politikisht ose fetarisht.

Gjatë një vizite në Damask në fund të tetorit, Ministri i Jashtëm gjerman Johann Wadephul, një anëtar i konservatorëve të Merz, shprehu tmerrin e tij për shkatërrimin që ishte ende i dukshëm në qytet, gati një vit pas rënies së al-Asadit.

"Është mezi e mundur që njerëzit të jetojnë këtu me dinjitet", tha ministri gjatë një vizite në periferinë Harasta, e cila u shkatërrua kryesisht gjatë luftës. "Në të ardhmen e afërt, [refugjatët sirianë] nuk mund të kthehen", tha Wadephul.

Komentet e tij shkaktuan reagime të ashpra nga brenda bllokut të tij konservator, i cili prej kohësh ka kërkuar rifillimin e deportimeve./ DPA News.