Presidenti i SHBA-së, Donald Trump, tha se SHBA-të kanë nevojë për Groenlandën për “mbrojtje kombëtare” dhe se “ne duhet ta kemi atë”.

Në përgjigje të pyetjes së BBC-së në lidhje me rolin e ri të Jeff Landry-t, guvernatorit republikan të Luizianës, i cili u emërua si i dërguari i posaçëm për Groenlandën, ai deklaroi gjithashtu se Uashingtoni "do të duhet ta zgjidhë atë" dhe se SHBA-të "kanë nevojë për Groenlandën për sigurinë kombëtare, jo për mineralet".

Presidenti amerikan shkaktoi një debat të ri me Danimarkën pasi emëroi guvernatorin e Luizianës, Jeff Landry, si të dërguar të posaçëm për Groenlandën, ishullin e madh arktik që ai tha se dëshiron ta aneksojë.

Kryeministrat e Danimarkës dhe Groenlandës, Mette Frederiksen dhe Jens-Frederik Nielsen, përsëritën në një deklaratë të përbashkët kërkesën për respektimin e kufijve të tyre, pasi Landry njoftoi më parë se ishte "i nderuar që shërbeu që Groenlanda të bëhej pjesë e Shteteve të Bashkuara të Amerikës".

"E kemi thënë edhe më parë, tani e përsërisim. Kufijtë kombëtarë dhe sovraniteti i shteteve janë të përcaktuara në të drejtën ndërkombëtare. Nuk mund të aneksosh vende të tjera", thanë kryeministrat në një deklaratë të përbashkët, raporton "The Guardian".

Ata shtuan se bëhet fjalë për "parime themelore".

"Grenlanda u përket grenlandezëve dhe SHBA-të nuk duhet ta pushtojnë Grenlandën. Ne presim respekt për integritetin tonë të përbashkët territorial", thuhet në deklaratë.

Më parë, Ministri i Jashtëm danez Lars Loke Rasmussen tha se vendi i tij këmbëngul që të gjithë, përfshirë Shtetet e Bashkuara të Amerikës, duhet të respektojnë "integritetin territorial të Mbretërisë së Danimarkës".

Zëdhënësi i BE-së, Anwar El-Anouni, reagoi gjithashtu ndaj deklaratës së Landry-t, duke thënë se integriteti territorial dhe sovraniteti i Mbretërisë së Danimarkës duhet të ruhet.

Në fillim të mandatit të tij të dytë presidencial, në janar të këtij viti, Trump deklaroi qëllimin e tij për të marrë përsipër Groenlandën, duke përmendur pozicionin e saj strategjik për sigurinë e SHBA-së si një shpjegim, ndërsa Danimarka, e cila ka kontrolluar territorin e Arktikut për 300 vitet e fundit, refuzoi të hiqte dorë nga Groenlanda.

Nuk është përpjekja e parë që SHBA-të të blejnë Groenlandën nga Danimarka, dhe negociatat e para të tilla u zhvilluan nga Sekretari i Shtetit i SHBA-së William H. Seaward në vitin 1867, kur nuk u arrit asnjë marrëveshje.

Në vitin 1946, SHBA-të ofruan 100 milionë dollarë për territorin, duke e konsideruar atë jetik për sigurinë kombëtare, por qeveria daneze refuzoi.

Trump u përpoq të blinte Groenlandën gjatë mandatit të tij të parë si president, por qeveritë daneze dhe të Groenlandës e refuzuan atë ofertë të vitit 2019.