Libani ka marrë paralajmërime nga palë të paidentifikuara arabe dhe ndërkombëtare, të cilat tregojnë se Izraeli po përgatitet të nisë një operacion ushtarak në shkallë të gjerë kundër vendit, tha të premten Ministri i Jashtëm libanez, Youssef Raggi.

Bejruti po intensifikon kontaktet e tij diplomatike “për të mbrojtur Libanin dhe objektet e tij nga çdo sulm i mundshëm”, tha Raggi në deklaratat e transmetuara nga Agjencia Kombëtare e Lajmeve e Libanit NNA.

Të enjten në mbrëmje, transmetuesi publik izraelit KAN raportoi se ushtria izraelite ka “përfunduar përgatitjet në javët e fundit për një sulm të gjerë ndaj vendeve të lidhura me Hezbollahun nëse qeveria dhe ushtria libaneze nuk arrijnë të përmbushin angazhimin e tyre për të çmontuar armët e grupit deri në fund të vitit 2025”.

Izraeli “ka informuar SHBA-në se do të veprojë vetë për të çarmatosur Hezbollahun nëse kjo nuk bëhet në mënyrë efektive, edhe nëse kjo çon në ditë luftimesh ose në një ripërtëritje të përleshjeve në frontin verior”, citoi transmetuesi një zyrtar të lartë të sigurisë, pa emër.

Raggi sqaroi se “takimet e vazhdueshme brenda komitetit të mekanizmit, nuk janë negociata tradicionale me Izraelin”.

Komiteti i mekanizmit u krijua sipas marrëveshjes së armëpushimit midis Izraelit dhe Hezbollahut, në fuqi që nga fundi i nëntorit 2024. Ai ka për detyrë të monitorojë zbatimin e armëpushimit dhe përfshin Libanin, Francën, Izraelin, SHBA-në dhe Forcën e Përkohshme të OKB-së në Liban.

“Ne po kërkojmë një rikthim në Marrëveshjen e Armëpushimit me Izraelin, ndërsa një traktat paqeje mbetet larg në këtë fazë”, tha ministri i jashtëm libanez.

Në të njëjtin kontekst, ai tha: “Armët e Hezbollahut kanë treguar efektivitet të kufizuar në operacionet që mbështesin Gazën dhe në mbrojtjen e Libanit.”

Ai shtoi se shteti libanez është i angazhuar në dialog me Hezbollahun "për ta bindur atë të dorëzojë armët e tij", duke vënë në dukje se grupi "deri më tani ka refuzuar".

Raggi e përshkroi rolin e Iranit në Liban dhe në rajon si "negativ", duke thënë se "politikat e Teheranit janë një burim paqëndrueshmërie".

Ai vuri në dukje se Libani ka “një problem me Iranin, por mbetet i hapur për dialog, me kusht që të ndalojë ndërhyrjen në punët e brendshme të Libanit dhe financimin e çdo organizate jo-legjitime brenda vendit”, sipas NNA-së.

Raporti i transmetuesit izraelit mbi zgjerimin e operacioneve kundër Hezbollahut, ishte i dyti nga mediat izraelite brenda dy javësh.

Më 30 nëntor, Channel 13 raportoi se “ushtria izraelite paraqiti një plan operacional për të zgjeruar sulmet kundër Hezbollahut, gjatë një takimi të posaçëm të mbajtur me kryeministrin Benjamin Netanyahu, ku morën pjesë disa ministra dhe zyrtarë të sigurisë”.

Një armëpushim ka qenë në fuqi në Liban që nga nëntori i vitit 2024, pas më shumë se një viti sulmesh që vranë më shumë se 4,000 njerëz dhe plagosën 17,000 të tjerë në sfondin e luftës gjenocidale izraelite në Gaza.

Të paktën 335 persona janë vrarë dhe 973 të tjerë janë plagosur në 1,038 sulme izraelite që nga hyrja në fuqi e armëpushimit, sipas Ministrisë së Shëndetësisë së Libanit.

Ushtria izraelite duhej të tërhiqej nga Libani jugor në janar 2025 sipas armëpushimit, por në vend të kësaj u tërhoq vetëm pjesërisht dhe vazhdon të mbajë një prani ushtarake në pesë pika kufitare./ AA.