Turqi, vritet në Stamboll disidenti iranian, u qëllua ndërsa kthehej në shtëpi

Një disident iranian vdiq në Stamboll pasi u qëllua të martën në mbrëmje, ndërsa po përgatitej të kthehej në shtëpi, sipas mediave turke dhe grupeve të të drejtave të njeriut.

Agjencitë private të lajmeve DHA dhe IHA raportuan se Masoud Nazari u sulmua në periferinë Arnavutköy dhe ndërroi jetë nga plagët e marra pak kohë më vonë në spital ku ishte dërguar.

Nazari ishte një kurd iranian nga Javanroud, provinca Kermanshah. Sipas organizatës së të drejtave të njeriut Haalvsh, me seli jashtë Iranit, ai ishte i njohur në qarqet fetare, sunite dhe kurde. Haalvsh e përshkroi atë si një kritik të ashpër të teokracisë shiite iraniane, duke thënë se ai ishte larguar nga Irani për në Turqi dhjetë vjet më parë. Një anëtar i familjes së Nazarit, identiteti i të cilit nuk u zbulua, i tha organizatës se ai kishte marrë kërcënime nga shërbimet iraniane të sigurisë.

“Vrasja e Masoud Nazarit është një shembull i ri i sulmeve të synuara të Republikës Islamike ndaj aktivistëve politikë dhe fetarë jashtë vendit”, tha organizata norvegjeze e të drejtave të njeriut Hengaw, e cila specializohet në çështjet që lidhen me zonat kurde të Iranit.

🔴|#İstanbul’da #İran Rejimine Muhalif Alim Şeyh Mesud Nazari Arnavutköy’deki evinin önünde uğradığı silahlı saldırı sonucunda HAYATINI KAYBETTİ! pic.twitter.com/0qKYUpjZiK

— O K A (@OKAreporter) October 15, 2025

Sipas mediave turke, autori i vrasjes së Nazarit nuk është arrestuar ende.