Punësimi i të diplomuarve të rinj në universitete në Evropë: Cilat vende ofrojnë perspektivat më të mira të punës?

Euronews Business ka analizuar shkallët e punësimit të të diplomuarve të fundit në arsimin e lartë në mbarë Europën, duke theksuar konkurrencën e lartë në tregun e punës dhe dallimet gjinore që vazhdojnë të jenë të pranishme. Sipas të dhënave të Eurostat, rreth 84.9% e të diplomuarve të rinj në Bashkimin Europian ishin të punësuar në vitin 2024, me individë të moshës 20 deri në 34 vjeç që kishin përfunduar studimet e tyre brenda tre viteve të fundit.

Megjithatë, tregu i punës mbetet i ashpër. Në Mbretërinë e Bashkuar, për shembull, punëdhënësit morën mbi 1.2 milion aplikime për vetëm 17,000 vende pune për të diplomuarit në vitin 2024 – mesatarisht 140 aplikime për çdo pozicion, niveli më i lartë i konkurrencës në më shumë se tre dekada.

Ndërsa Bullgaria kryeson me 93.7% të punësuar, Turqia renditet në fund me vetëm 63.5%, duke pasur gjithashtu shkallën më të lartë të papunësisë në kontinent. Greqia ndjek me 72.7%, ndërsa në vendet si Italia dhe Franca, shkalla e punësimit mbetet nën 80%. Në të kundërt, Gjermania, Holanda, Norvegjia dhe Estonia raportojnë nivele mbi 90%, duke u bërë ndër tregjet më të favorshme për të rinjtë e arsimuar.

Pabarazia gjinore vazhdon të jetë një sfidë. Në BE, 86% e burrave të diplomuar janë të punësuar kundrejt 84% të grave. Megjithatë, Greqia është përjashtim, ku punësimi i grave tejkalon atë të burrave me 7.4 pikë përqindjeje. Në anën tjetër, Turqia paraqet hendekun më të madh gjinor në Evropë, me 74.2% të burrave kundrejt vetëm 55.2% të grave të punësuara.

Sipas Euronews Business, këto të dhëna nxjerrin në pah kontrastet e mëdha midis vendeve europiane dhe tregojnë se, pavarësisht rritjes së arsimit të lartë, sfidat për punësim të qëndrueshëm dhe të barabartë mbeten të forta, sidomos për gratë dhe për vendet e Evropës Jugore dhe Juglindore.