Liderët Evropianë Bashkohen në Luftën Kundër Drogës: Lind Koalicioni Evropian Kundër Drogës

Nga Alba Kepi

Në kuadër të Samitit të 7-të të Komunitetit Politik Evropian, liderët e vendeve evropiane riafirmuan angazhimin e tyre të përhershëm për të luftuar trafikun dhe kërcënimet e lidhura me drogën në Evropë. Ata e konsiderojnë trafikun e drogës si një nga kërcënimet më serioze për sigurinë, shëndetin dhe mirëqenien e qytetarëve. Liderët nxitën ndërgjegjësimin mbi rreziqet dhe dëmet e drogës, përfshirë drogat sintetike, dhe theksuan nevojën për gjetjen e zgjidhjeve të përbashkëta për të mbrojtur shoqëritë evropiane.

Deklarata e samitit theksoi rëndësinë e një qasjeje të balancuar dhe të bazuar në prova, që përfshin parandalimin, uljen e kërkesës dhe veprime të forta kundër rrjeteve kriminale. Liderët ranë dakord se për të përballuar këtë kërcënim duhet të forcohen strategjitë kundër trafikut të paligjshëm të drogës, përmes përmirësimit të kuptimit të përbashkët të kërcënimeve kriminale, veprimit të koordinuar në trafikun portual dhe detar, si dhe inkurajimit të bashkëpunimit brenda Platformës Evropiane Kundër Kërcënimeve Kriminale (EMPACT).

Një pjesë tjetër e rëndësishme e strategjisë përfshin monitorimin financiar për të luftuar ekosistemin kriminal që mbështet trafikun e drogës, duke synuar flukset e paligjshme të parave, pastrimin e parave dhe korrupsionin. Bashkëpunimi gjyqësor duhet të përmirësohet për të identifikuar, sekuestruar dhe konfiskuar pasuritë kriminale, duke ndjekur strategjinë “ndiqni paratë” dhe duke promovuar aksesin në regjistra transparentë të pronarëve të vërtetë të kompanive.

Liderët gjithashtu theksuan nevojën për një qasje globale që përfshin masa shëndetësore, si parandalimi, trajtimi, reduktimi i dëmeve dhe rehabilitimi. Politikat efektive duhet të fokusohen tek popullatat më të cenueshme, veçanërisht në situata krize ose konflikti, dhe të krijohen ose forcohen observatorë kombëtarë për drogën si dhe mekanizma paralajmërimi të hershëm për substanca të reja dhe modele të reja të konsumit. Standardet e kujdesit dhe të trajtimit duhet të jenë të përbashkëta në të gjitha qendrat shëndetësore.

Liderët riafirmuan angazhimin e tyre për të bashkëpunuar ngushtësisht për të luftuar epideminë e drogës në Evropë dhe për të forcuar koordinimin me qëllim reduktimin e ofertës, uljen e kërkesës dhe zvogëlimin e dëmeve shëndetësore dhe sociale të shkaktuara nga droga.

Si rezultat i këtij angazhimi, u krijua Koalicioni Evropian Kundër Drogës (ECAD) – një platformë që bashkon vendet dhe organizatat ndërkombëtare për të adresuar në mënyrë operative dhe pragmatike sfidat kryesore të trafikut të drogës. ECAD synon të bëhet një mjet efektiv për koordinim ndërkombëtar, duke forcuar masat kundër krimit të organizuar dhe duke promovuar politika preventive dhe shëndetësore – një hap vendimtar drejt një Evrope më të sigurt dhe më të shëndetshme.