Presidenti i Sirisë, Ahmed Al-Sharaa, zhvilloi një takim të rëndësishëm me Ronald Lauder, presidentin e Kongresit Botëror Hebraik, gjatë pjesëmarrjes së tij në Asamblenë e Përgjithshme të Kombeve të Bashkuara në Nju Jork, të dielën. Lajmi u bë i ditur nga Kanali Sirian i Lajmeve. -

Sipas raportit, Lauder, i cili ka prejardhje siriane, ka qenë i përfshirë në mënyrë aktive në negociatat siriano-izraelite që nga vitet 1990. Takimi mes tij dhe Al-Sharaa u përqendrua në zhvillimet e fundit të diplomacisë mes Sirisë dhe Izraelit, me theks të veçantë në përpjekjet për të arritur një marrëveshje sigurie ndërmjet dy vendeve.

Burime diplomatike nga Shtetet e Bashkuara kanë bërë të ditur se një marrëveshje e tillë mund të arrihet së shpejti, ndërsa bashkëpunimi mes palëve është intensifikuar ndjeshëm javët e fundit.

Al-Sharaa është udhëheqësi i parë nga Siria që merr pjesë dhe flet në Asamblenë e Përgjithshme të OKB-së që nga viti 1967. Në fjalimin e mbajtur më 24 shtator, ai deklaroi se është “i përkushtuar për dialog” me udhëheqësit e kombeve të tjera, duke sinjalizuar një qasje më të hapur dhe bashkëpunuese në politikën e jashtme të Damaskut.