Ish-kancelarja gjermane, Angela Merkel, ka bërë thirrje për një Bashkim Evropian të fortë dhe të bashkuar përballë krizave globale dhe politikave proteksioniste të Shteteve të Bashkuara. Ajo gjithashtu nënvizoi rëndësinë e vazhdimit të reformave brenda bllokut evropian.

“Ne jemi të gjithë, madje edhe Gjermania, më e madhja ekonomikisht, krejtësisht të vetëm në fushë të hapur,” tha Merkel gjatë ceremonisë në nder të 80-vjetorit të lindjes së ish-presidentit të Parlamentit Evropian, Hans-Gert Pöttering. Ish-kancelarja shtoi se kjo thekson rëndësinë e bashkëpunimit dhe veprimit të përbashkët brenda BE-së.

Merkel paralajmëroi për rrezikun që BE-ja të humbasë efektivitetin në vendimmarrje nëse nuk kryhen reforma të duhura. Ajo u shpreh se liderët aktualë duhet të ruajnë “ekuilibrin e mirë midis jo shumë rregulloreve” për të mos e bërë bllokun evropian të paaftë për veprim.

Gjithashtu, ish-kancelarja kritikoi strukturën e Parlamentit Evropian, duke vënë në dukje se mundësia për të rrëzuar Komisionin Evropian me një votë mosbesimi nuk ka të njëjtat pasoja si në parlamentet kombëtare, pasi nuk çon automatikisht në zgjedhje të reja. “Të largosh dikë nga detyra dhe të mos kesh pasoja vetë, mendoj se është një çekuilibër,” deklaroi Merkel.