Drejtësia nigeriane dënoi dje, të shtunën, 44 xhihadistë të Boko Haram me burgime deri në 30 vjet për financim të veprimtarive terroriste, njoftoi një agjenci qeveritare.

Të dënuarit ishin në mesin e 54 të pandehurve që po gjykoheshin në gjykata speciale civile në qytetin Kaindzhi (në lindje), sipas Abu Michael, zëdhënës i qendrës së luftës kundër terrorizmit të Nigerisë, i cili publikoi një deklaratë për rastin.

“Vendimet e shpallura në këtë gjyq çuan në dënime me burg nga 10 deri në 30 vjet, të gjitha të shoqëruara me punë të detyruar,” sqaroi ai.

Në Nigeri, këtë javë kanë rifilluar gjyqet që kishin mbetur pezull për shtatë vjet, ndaj 1.000 personave që dyshohet se kanë lidhje me organizatën xhihadiste Boko Haram, në zemër të një kryengritjeje që prej vitit 2009, e cila synon themelimin e një kalifati.

“Me këto dënime të fundit, Nigeria ka regjistruar gjithsej 785 çështje të lidhura me financimin e terrorizmit dhe krime të tjera të lidhura me terrorizmin,” sipas deklaratës.

Nga kryengritja xhihadiste dhe ofensiva e forcave të armatosura të Nigerisë për ta shtypur, gjatë 16 viteve të fundit, kanë humbur jetën të paktën 40.000 persona dhe mbi 2 milionë të tjerë janë zhvendosur, sipas OKB-së. Kjo valë dhune është përhapur edhe në vendet fqinje: Kamerun, Çad dhe Niger.

Në tetor të vitit 2017, në Nigeri nisën gjyqe në grup për xhihadistët, më shumë se tetë vjet pas shpërthimit të kryengritjes.

Brenda pesë muajve, 200 persona të dyshuar si xhihadistë u dënuan me burgime nga 20 deri në 70 vjet, me burgime të përjetshme dhe me dënim me vdekje, sipas z. Michael.

Këto dënime u dhanë nga drejtësia e vendit më të populluar të Afrikës për vepra të tilla si: sulme ndaj grave dhe fëmijëve, shkatërrim të vendeve të kultit, vrasje civilësh dhe rrëmbim të grave e fëmijëve. Syri.net-Protothema