Ankara - Ministri i Jashtëm i Turqisë Hakan Fidan do të shkojë në Doha të mërkurën, ku është planifikuar të takohet me zyrtarë të Katarit në përpjekje për të frenuar përshkallëzimin e shpejtë rajonal midis Iranit dhe Izraelit.

Ministria e Jashtme turke tha se Fidan do të takohet me kryeministrin e Katarit Sheikh Mohammed bin Abdulrahman Al Thani, i cili gjithashtu shërben si diplomati më i lartë i fuqisë së Gjirit, për të diskutuar "situatën në Palestinë dhe zhvillimet rajonale".

Fidan pritet gjithashtu të takohet me liderët politikë të Hamasit me bazë në kryeqytetin e Katarit, njoftoi televizioni publik turk TRT, duke cituar burime diplomatike. Ankaraja nuk e konsideron Hamasin një grup terrorist dhe udhëheqësit politikë të grupit militant mund të shkojnë lirisht në Turqi.

Presidenti turk Rexhep Tajip Erdogan është ndër kritikët më të zëshëm të Izraelit lidhur me përkeqësimin e krizës humanitare në Gaza. Javën e kaluar, Ankaraja njoftoi kufizime të eksportit për dhjetëra produkte në Izrael dhe synimet për t'i ruajtur ato deri në arritjen e një armëpushimi në Gaza.

Pas vizitës së Fidanit, Ministri i Jashtëm egjiptian Sameh Shoukry pritet të vizitojë gjithashtu Turqinë për të diskutuar mbi zhvillimet e fundit gjatë fundjavës, sipas TRT.

Lëvizja në rritje e diplomacisë vjen ndërsa Izraeli peshon përgjigjet e mundshme ndaj sulmit të Iranit kundër Izraelit të dielën.

Fuqitë rajonale, përfshirë Turqinë, Katarin dhe Egjiptin, po i paralajmërojnë të dyja palët kundër përshkallëzimit të mëtejshëm. Teherani tha se sulmi i paprecedentë ishte në hakmarrje për sulmin e shtetit hebre ndaj një misioni diplomatik iranian në kryeqytetin sirian në fillim të këtij muaji.

Konflikti në Gaza dhe përshkallëzimi midis Iranit dhe Izraelit ishin gjithashtu në axhendën e takimit mes Fidanit dhe Zëvendës Sekretarit të Shtetit për Çështjet Politike, John Bass, të hënën.

Pas takimit, zyrtari i lartë amerikan u takua të martën me kryekëshilltarin dhe zëdhënësin e Erdoganit, Akif Çagatay Kiliç. Kiliç tha se të dy diskutuan lidhjet dypalëshe dhe çështje të tjera ndërkombëtare.