Vetëm një nga 14 mostrat e ujit tregojnë se lumi është i sigurt për të bërë not, nxorën analizat e Surfrider Foundation.

Dyshime të reja janë hedhur mbi mundësinë që Parisi të zhvillojë aktivitetet olimpike të notit në lumin e tij të ndotur të Senës.

Shumë emocion u krijua nga njoftimi i vitit të kaluar se Sena do të ishte e hapur për notarët publikë në vitin 2025, pas organizimit të aktiviteteve të triathlonit këtë verë.

Por marrja e mostrave të ujit nga krahu evropian i Fondacionit Surfrider ka zbuluar se bakteret - duke përfshirë "ndotjen me origjinë fekale" - mbeten jashtëzakonisht të larta.

“Prandaj është e qartë se sportistët që do të marrin pjesë në aktivitetet olimpike dhe paraolimpike të planifikuara për në Senë do të notojnë në ujë të ndotur dhe do të pësojnë rreziqe të konsiderueshme për shëndetin e tyre”, tha organizata jofitimprurëse në një deklaratë javën e kaluar.

Pse Sena është kaq e ndotur?

Sado romantike të tingëllojë, larja në Senë është e ndaluar që nga viti 1923 për shkak të rrezikut nga trafiku i anijeve dhe ndotja e ujit.

Lumi ikonik i Parisit është i ndotur nga ujërat e zeza të patrajtuara. Impiantet e trajtimit në rrjedhën e sipërme të lumit mund të derdhin ujëra të zeza kur ato mbingarkohen gjatë periudhave të shiut të dendur.

Fondacioni Surfrider fajëson gjithashtu keqfunksionimet në rrjetin e ujërave të zeza, si dhe maunet dhe banesat buzë lumit që nuk janë të lidhura me rrjetet e ujërave të zeza.

1.9 milion metra kub ujëra të zeza u derdhën në Senë në vitin 2022.

Si po pastrohet Sena?

Për të zgjidhur këto çështje, bashkia e Parisit ka nisur një projekt pastrimi prej 1.4 miliardë eurosh.

Ajo po ndërton një pellg akumulimi 50,000 metra kub të ujit të shiut në rrjedhën e sipërme të urës Austerlitz. Ky rezervuar nëntokësor - i ushqyer nga një tunel 700 metra i gjatë - është projektuar për të mbajtur ujin gjatë stuhive, përpara se ta lëshojë atë përsëri në sistemin e kanalizimit.

Në vitin 2018, qyteti tha se të gjitha anijet duhej të lidheshin me sistemin e kanalizimeve të Parisit dhe ka vendosur të instalojë tubacione të reja në porte. Por progresi ka qenë i ngadalshëm dhe disa pronarë varkash thonë se janë vënë në shënjestër padrejtësisht, krahasuar me fqinjët e tyre që banojnë në tokë.

Bashkia ka punuar gjithashtu për rregullimin e lidhjeve nga shtëpitë pariziane me sistemin e kanalizimeve, pasi disa i lëshonin mbetjet e tyre direkt në Senë ose në degët e saj.