Byroja Federale e Burgjeve tha të hënën se po planifikonte të mbyllte një burg të grave në Kaliforni të njohur si "klubi i përdhunimit" pavarësisht përpjekjeve për të reformuar objektin e trazuar, pasi një hetim i Associated Press ekspozoi abuzimin seksual të shfrenuar të personelit me të burgosurat.

Drejtoresha e Byrosë së Burgjeve, Colette Peters, tha në një deklaratë për AP se agjencia kishte "ndërmarr hapa të paprecedentë dhe ofruar një sasi të madhe burimesh për çështjet e  kulturës, rekrutimt dhe mbajtjen e infrastrukturës së vjetër – si dhe sjelljen e pahijshme të punonjësve".

“Pavarësisht këtyre hapave dhe burimeve, ne kemi përcaktuar se FCI Dublin nuk po përmbush standardet e pritura dhe se mënyra më e mirë e veprimit është mbyllja e objektit,” tha Peters. “Ky vendim është marrë pas vlerësimit të vazhdueshëm të efektivitetit të atyre hapave të paprecedentë dhe burimeve shtesë.”

Avokatët kanë bërë thirrje që të burgosurit të lirohen nga FCI Dublin, i cili sipas tyre nuk është vetëm i rrënuar nga abuzimi seksual, por gjithashtu ka myk të rrezikshëm, asbest dhe kujdes të pamjaftueshëm shëndetësor.

Muajin e kaluar, FBI e kontrolloi përsëri burgun dhe Byroja e Burgjeve i shkundi sërish drejtuesit e saj, pasi një gardian i dërguar për të ndihmuar në rehabilitimin e objektit u akuzua për hakmarrje ndaj një të burgosure sinjalizuese. Ditë më vonë, një gjykatëse federale që mbikëqyrte paditë kundër burgut, tha se do të caktonte një person të posaçëm për të mbikëqyrur funksionimin e objektit.

Një hetim i AP në vitin 2021 zbuloi një fenomen abuzimi dhe fshehjeje që kishte vazhduar për vite në burg. Ky raportim çoi në një kontroll të shtuar nga Kongresi dhe premtime nga Byroja e Burgjeve se do të rregullonte problemet dhe do të ndryshonte sjelljen në burg.

Që nga viti 2021, të paktën tetë punonjës të FCI Dublin janë akuzuar për abuzim seksual të të burgosurave. Pesë e kanë pranuar fajësinë. Dy u dënuan në gjyq, përfshirë ish-gardianin, Ray Garcia. Një tjetër rast është në pritje.

Gushtin e kaluar, tetë të burgosura të FCI Dublin paditën Byronë e Burgjeve, duke pretenduar se agjencia nuk kishte arritur të çrrënjoste abuzimin seksual.

Amaris Montes, një avokate e paditëseve, tha se të burgosurat vazhduan të përballeshin me hakmarrje për raportimin e abuzimit, duke përfshirë vendosjen në izolim dhe konfiskimin e sendeve.

Të gjitha aktivitetet seksuale ndërmjet një punonjësi të burgut dhe një të burgosureje janë të paligjshme. Punonjësit korrektues kanë fuqi të konsiderueshme mbi të burgosurit, duke kontrolluar çdo aspekt të jetës së tyre nga ora e ngrënies deri te fikja e dritave.