Nga Reem Asalem

Në cilësinë time si raportuese e posaçme e OKB-së për dhunën ndaj grave dhe vajzave, në shumë raste kam shprehur shqetësimin për erozionin në rritje të së drejtës së grave për barazi dhe liri nga diskriminimi bazuar në gjini, dhe kam qenë mbështetëse e ruajtjes së hapësirave për persona të së njëjtës gjini kur është e nevojshme për të ruajtur privatësinë, sigurinë dhe dinjitetin e tyre – duke përfshirë këtu edhe botën e sportit.

Së fundmi i kam dërguar një komunikatë zyrtare qeverisë së Shteteve të Bashkuara për të theksuar pikërisht këtë pikë. Aktualisht, qeveria e SHBA-ve po shqyrton ndryshime në rregulloret që zbatojnë Titullin IX të Amendamenteve të Arsimit të vitit 1972 – një kuadër ligjor që ndalon në mënyrë specifike diskriminimin gjinor në një sërë fushash. Që kur u bë ligj, Titulli IX u ka dhënë një shtysë shkollave dhe universiteteve për të ofruar të njëjtin nivel programimi dhe bursa për studentët, pavarësisht nga gjinia e tyre, duke sjellë përparime kritike për barazinë e femrave në SHBA, e sidomos në sportet e femrave.

Ndryshimet në pritje, të planifikuara për publikim në mars, mund t'i detyrojnë shkollat të lejojnë atletët biologjikisht meshkuj që identifikohen si gra ose vajza të konkurrojnë në ekipe vetëm për femra, me pasoja dramatike për pjesëmarrjen e grave dhe vajzave në sport. Siç e kam përmendur në komunikimin tim, kam arsye të forta për të besuar se rregulli i propozuar mund të jetë në kundërshtim me detyrimet e SHBA-së për të drejtat e njeriut në lidhje me barazinë dhe mosdiskriminimin ndaj grave e vajzave.

U bëj jehonë shqetësimeve të sportisteve femra dhe organizatave sportive të grave se rishikimet e propozuara të administratës Biden ka të ngjarë t'i privojnë femrat-sportiste nga mundësi të barabarta sportive, njohje publike dhe mundësi të merituara për bursa. Kemi parë raste të shumta në të cilat prania e vetëm një mashkulli në një ekip femrash mjafton për të rrëzuar femrat dhe vajzat nga podiumi.

Për më tepër, lejimi i atleteve të lindura meshkuj për të konkurruar në sportet e grave dhe vajzave gjithashtu rrit në mënyrë dramatike cenueshmërinë e atleteve femra ndaj lëndimeve. Fatkeqësisht, frika e përjetimit të një dëmi të tillë bën që gratë dhe vajzat të zgjedhin të vetëpërjashtohen nga pjesëmarrja. Lejimi i individëve të seksit meshkuj boksojnë, të bëjnë mundje, të shtyjnë ose të godasin atletet femra në një fushë loje mund të normalizojë dhe madje të legjitimojë sjellje të tilla jashtë fushës.

Rregulloret e propozuara të Titullit IX do të kërkonin gjithashtu që femrat studente-atlete të ndajnë dhomat e zhveshjes dhe hapësirat e tjera intime me meshkujt, pavarësisht se si identifikohen. Unë jam thellësisht e shqetësuar se kjo do të rezultojë në mënyrë të pashmangshme në zaptime më të shpeshta të privatësisë dhe kërcënime në rritje të konsiderueshme për ngacmim, vojeurizëm dhe sulme fizike dhe seksuale kundër tyre.

Nuk duhet të injorohet se ndryshimet e synuara mund të dëmtojnë më tej pjesëmarrjen e grave dhe vajzave në jetën kulturore dhe arsimore në SHBA, pasi performanca atletike mund t'u sigurojë studentëve të talentuar shtigje drejt arsimit të lartë.

Me përjashtim të disa përjashtimeve, sporti globalisht është ndarë në kategori meshkuj dhe femra për shkak të avantazhit të performancës së meshkujve. Edhe pse më e dukshme pas pubertetit, studime të shumta kanë dokumentuar se meshkujt ruajnë avantazhet e performancës në sport gjatë gjithë jetëgjatësisë së tyre dhe se ndërsa këto avantazhe mund të zbuten, ato nuk mund të shtypen.

Unë e pranoj sigurisht që të gjitha nxënëset, përfshirë gratë dhe vajzat transgjinore, kanë të drejtën për një jetë pa diskriminim dhe ngacmim. Megjithatë, kam besim se ruajtja e kategorive të mbrojtura të femrave në sport nuk cenon të drejtat e tyre. Në fakt, e drejta dhe aftësia e të gjithë nxënësve për të marrë pjesë në sport, përfshirë nxënëset transgjinore, nuk kërcënohen nga mbajtja e sporteve të ndara nga seksi.

Mund të krijohen lehtësisht kategoritë e hapura për studentët që nuk dëshirojnë të konkurrojnë në kategoritë e seksit të tyre të lindjes. Në këtë mënyrë, dinjiteti dhe privatësia e të gjithë nxënësve mund të vazhdojë të ruhet dhe respektohet pasi shkollat mund të verifikojnë seksin e tyre biologjik me mjete të thjeshta dhe jo invazive.

Ne e dimë shumë mirë se ajo që ndodh në SHBA nuk qëndron në SHBA. Një ndryshim në Titullin IX mund të krijojë një precedent shqetësues që mund të ndiqet në pjesë të tjera të Veriut Global dhe të botës. Edhe para hapjes së kategorive të femrave në sport për meshkujt, pjesëmarrja e rregullt e femrave dhe vajzave në aktivitete sportive dhe atletike ishte më e ulët se ajo e meshkujve për një sërë arsyesh. Lejimi i aksesit të meshkujve në hapësirat sportive vetëm për femra nuk do të ndihmojë në ndryshimin e këtij trendi, por përkundrazi do ta ndihmojë dhe mbështesë atë.