Mbretëria e Bashkuar ka rënë në recesion. Kjo sipas shifrave zyrtare që u treguan të enjten, vetëm disa muaj para zgjedhjeve të përgjithshme, duke prishur premtimin e kryeministrit, Rishi Sunak për të gjeneruar rritje ekonomike.

Produkti i brendshëm bruto ra 0.3 për qind në tre muajt e fundit të 2023-ës, pas një tkurrjeje prej 0.1 për qind në periudhën korrik-shtator, tha Zyra për Statistikat Kombëtare. Një recesion zakonisht përkufizohet si dy tremujorë të njëpasnjëshëm të tkurrjes.

“Të gjithë sektorët kryesorë ranë në tremujor, me prodhimtarinë, ndërtimin dhe shitjen me shumicë që janë zvarritjet më të mëdha të rritjes, të kompensuara pjesërisht nga rritjet e hoteleve dhe dhënieve me qira të automjeteve dhe makinerive”, tha në një deklaratë drejtoresha e statistikave ekonomike të ONS, Liz McKeown.

“Gjatë vitit 2023 në tërësi ekonomia ka qenë gjerësisht e sheshtë”.

ONS vlerëson se PBB-ja e Mbretërisë së Bashkuar u rrit me 0.1 për qind vitin e kaluar – rritja më e dobët që nga viti 2009 në mes të një krize financiare globale, nëse përjashtohet viti 2020, i cili u prek nga pandemia. Kjo pason një rritje prej 4.3 për qind në 2022.