Të gjitha zhvillimet e fundit nga lufta në Ukrainë.

Presidenti ukrainas Volodymyr Zelenskyy u takua të mërkurën me kryediplomatin e Bashkimit Evropian Josep Borrell në Kiev.

Zyra presidenciale njoftoi në një deklaratë se të dy diskutuan, ndër të tjera, për projektligjin më të fundit të Ukrainës që synon të rrisë mobilizimin.

Ata diskutuan gjithashtu për ndihmën ushtarake dhe mbështetjen financiare për Ukrainën.

Borell u zotua se BE do t'i sigurojë Ukrainës mbi një milion predha artilerie deri në fund të vitit. Ndihma financiare dhe ushtarake janë jetike për Kievin, forcave të armatosura të të cilit thuhet se po u mbarojnë municionet.

SHBA do të hartojë projekt-ligj të ri 

Shqetësimet e mbështetjes së lëkundur janë përqendruar në SHBA. Senatorët republikanë, për shkak të presionit nga Donald Trump, kanë bllokuar legjislacionin gjithëpërfshirës që do të sillte kufizime më të ashpra kufitare dhe do të jepte ndihmë të re për Ukrainën dhe Izraelin.

Projektligji përfshinte 55.6 miliardë euro ndihmë për Ukrainën gjatë kohës së luftës dhe 12.9 miliardë euro për Izraelin dhe u mbështet nga Presidenti Joe Biden. Ligjvënësit republikanë kishin këmbëngulur që paratë për konfliktet jashtë vendit të bashkoheshin me ndihmën për kufirin amerikan.

Senatorët tani po përpiqen të krijojnë një version të ri të një projektligji që do të kalojë, i cili ka hequr të gjitha masat e sigurisë kufitare, duke lënë ndihmën e huaj.

Luftëtarët kolumbianë në Ukrainë

Pas dy vitesh luftë, radhët e Ukrainës janë varfëruar.

Tani, ushtarë profesionistë nga Kolumbia po forcojnë radhët e vullnetarëve nga e gjithë bota që i janë përgjigjur thirrjes së presidentit ukrainas Volodymyr Zelenskyy për luftëtarët e huaj që t'i bashkohen luftës së kombit të tij me Rusinë.

Me një ushtri prej 250,000, Kolumbia ka ushtrinë e dytë më të madhe të Amerikës Latine, pas Brazilit. Më shumë se 10,000 dalin në pension çdo vit. Dhe qindra po shkojnë për të luftuar në Ukrainë, ku shumë paguhen katër herë më shumë sesa fitojnë nënoficerët me përvojë në Kolumbi, ose edhe më shumë.

Tani e mbyllur në një ngërç në fushën e betejës me Rusinë, Ukraina po e zgjeron sistemin e saj duke lejuar njerëz nga e gjithë bota të bashkohen me ushtrinë ukrainase, tha Oleksandr Shahuri, një oficer i Departamentit të Koordinimit të të Huajve në Forcat e Armatosura të Ukrainës.

Në fillim të vitit 2022, autoritetet thanë se 20,000 njerëz nga 52 shtete ndodheshin në Ukrainë. Tani, në përputhje me sekretin rreth çdo numri ushtarak, autoritetet nuk do të thonë se sa janë në fushën e betejës, por ata thonë se profili i luftëtarëve ka ndryshuar.

Shahuri shpjegoi se ndërsa valët e para të vullnetarëve erdhën kryesisht nga vendet post-sovjetike ose anglishtfolëse, ushtria tani ka zhvilluar një infrastrukturë të rekrutuesve, instruktorëve dhe oficerëve të rinj operacionalë spanjisht-folës.

Hector Bernal, një ish-mjek luftarak në pension, i cili drejton një qendër për mjekësinë taktike jashtë Bogotas, thotë se në tetë muajt e fundit ai ka trajnuar më shumë se 20 kolumbianë që  luftojnë në Ukrainë.