Joe Biden po përpiqet të rekrutojë Taylor Swift-in si një influencere për fushatën e tij presidenciale për të rritur shifrat e tij të dobëta në sondazhe para zgjedhjeve të ardhshme në SHBA.

Fushata e presidentit beson se ylli i popit, 34 vjeçe, mund të rikthejë mbështetjen e tij mes votuesve të rinj dhe po e shtyn atë ta mbështesë në rrjetet sociale.

Swift, e cila u shpall Personi i Vitit nga Time dhe ylli më i madh i popit i Revistës Billboard për vitin 2023, po shijon një vëmendje të madhe të shtypit në Shtetet e Bashkuara me turneun e saj të shitur Eras dhe marrëdhënien e re me Travis Kelce, një lojtar i njohur i futbollit amerikan.

Këngëtarja mbështeti zotin Biden dhe Kamala Harrisin në vitin 2020 dhe besohet të jetë një demokrate, duke mbështetur publikisht të drejtat e LGBTQ dhe abortinm. Në vitin 2018, ajo mbështeti kandidatët demokratë në garën për Kongresin në Tenesi, ku jetoi si adoleshente.

Swift, e cila ka 279 milionë ndjekës në Instagram, ka treguar më parë se ka fuqinë për të fituar përkrahësit e saj për çështjet politike. Shtatorin e kaluar, thirrja e saj për fansat që të regjistroheshin për të votuar bëri që të kishte më shumë se 35,000 regjistrime.

Gavin Newsom, guvernatori demokrat i Kalifornisë, veçoi Swift-in kur u pyet për rolin e përkrahjes së të famshmëve në fushatën e 2024-ës.

"Unë mendoj se Taylor Swift është krenare dhe unike," u tha ai gazetarëve në shtator. "Ajo që ajo arriti vetëm duke aktivizuar të rinjtë, për të konsideruar që ata të kenë një zë dhe që duhet të kenë një zgjedhje në votimet e ardhshme, është e fuqishme."

Fushata e rizgjedhjes së zotit Biden ka probleme me votuesit më të rinj, pasi shumë e kanë braktisur atë për Donald Trump ose kanë vendosur të mos votojnë fare pasi janë zhgënjyer me mbështetjen e administratës aktuale për Izraelin dhe dështimin e perceptuar për të trajtuar ndryshimet klimatike.

Një sondazh i Universitetit të Suffolk-ut të publikuar më 1 janar zbuloi se Trump tani është në avantazh me zotin Biden me 37 për qind në 33 për qind mes votuesve nën 35 vjeç – një demografi që e mbështeti në masë të madhe presidentin në vitin 2020.

Sondazhet tregojnë gjithashtu se më pak votues në grupmoshën 18-29 vjeç synojnë të votojnë në zgjedhjet e ardhshme sesa në votimin e vitit 2020, ku pati pjesëmarrje rekord të të rinjve.

New York Times raportoi se atyre që aplikojnë për një punë në fushatën e Biden-it u është kërkuar të mos paraqesin ide se si të fitohet një mbështetje nga zonja Swift sepse ekipi ka marrë tashmë shumë sugjerime.

Fushata ka diskutuar gjithashtu dërgimin e zotit Biden për t'iu bashkuar zonjës Swift në turneun e saj në një përpjekje për të fituar zemrën e "Swifties" - emri kolektiv për fansat e saj.

Të premten, Shtëpia e Bardhë komentoi imazhet eksplicite të zonjës Swift të krijuara nga IA-ja që kishin qarkulluar në internet, duke i bërë thirrje Kongresit të miratojë kufizime të reja.

Zëdhënësi i Biden-it nuk pranoi të komentonte mbi raportet se fushata po kërkonte mbështetje nga zonja Swift në një konferencë shtypi në Uashington të hënën./telegraph.co