Kosta Rika regjistroi vitin më të përgjakshëm në historinë e saj në 2023, ku shkalla e vrasjeve u rrit, fakt që i atribuohet kryesisht përshkallëzimit të konflikteve mes bandave të trafikut të drogës. Për dekada të tëra ky vend konsiderohej më i sigurti në të gjithë rajonin.

Kosta Rika, një vend i njohur për vendimin e tij për të shfuqizuar ushtrinë e saj më shumë se 70 vjet më parë, regjistroi 907 vrasje vitin e kaluar, një rritje prej 38 për qind nga viti në vit.

E famshme për ekoturizmin e saj dhe sjelljen e qetë dhe tolerante të shumë prej qytetarëve të saj, Kosta Rika tejkaloi rekordin e saj të mëparshëm për vrasje deri në shtator 2023.

Norma kombëtare e vrasjeve u rrit në 17.2 për 100,000 banorë vitin e kaluar, nga 12.5 në 2022, tha drejtori i OIJ Randall Zuniga gjatë një konference shtypi, duke ia atribuar shumicën e rritjes së vrasjeve konflikteve midis bandave.

Autoritetet ia atribuojnë këto vrasje konflikteve të bandave mbi kontrollin e tregtisë së drogës, për shkak të pozicionit strategjik që vendi ka midis shteteve prodhuese të drogës të Amerikës Latine dhe ka lidhje të bollshme me tregjet e SHBA-së dhe Evropës.

Në korrik, ministri i Sigurisë së Kosta Rikës, Mario Zamora, i tha agjencisë së lajmeve Reuters se ndikimi në rritje i karteleve meksikane të drogës dhe rritja e prodhimit të kokainës në Kolumbi po e çonin numrin e vrasjeve në nivele të paprecedentë për Kosta Rikën.

“Tendenca e pastrimit të parave është rritur në 70%, një nivel që nuk e kemi parë kurrë më parë,” sipas z. Zuniga, i cili premtoi se autoritetet do të reduktonin vrasjet në vitin 2024.

Provinca e kryeqytetit San Jose u godit më shumë nga dhuna. Të dhënat tregojnë se vrasjet atje janë rritur me 86%.

Rritja e vrasjeve reflekton një skenar “kompleks”, sipas z. Zuniga, i cili vuri në dukje se para vitit 2022 shkalla kombëtare e vrasjeve nuk arrinte as në 11 për 100,000 banorë, një nivel që ai e konsideron “të pranueshëm”. Zoti Suniga sugjeroi që të rriten shpenzimet për sigurinë publike.