Tre ditë më parë forcat ajrore të Ukrainës sulmuan dhe fundosën një anije të madhe të ankoruar në Krimenë e pushtuar nga Rusia dhe është shumë e besueshme që sulmi i sotëm rus, kryesisht në zonat civile në qytetet më të mëdha të Ukrainës, është një përgjigje e drejtpërdrejtë ndaj kësaj.

Rusia ka folur vetëm për dëmtimin e anijes Novocherkassk dhe për një vdekje. Por imazhet satelitore të Feodosiya tregojnë se anija u shkatërrua plotësisht dhe ka raporte për dhjetëra vdekje, deri tani të pakonfirmuara.

Komentatorët ukrainas theksojnë se megjithëse qytetet e tyre u vunë në shënjestër nga 158 dronë dhe raketa ruse - duke përfshirë deri në 90 raketa lundrimi të lëshuara nga avionët luftarakë rusë - asnjëra nuk duket të jetë lëshuar nga marina ruse.

Pra, pjesërisht mund të jetë hakmarrje për sulmin vdekjeprurës të mëngjesit të së martës në Novocherkassk - i fundit në një varg humbjesh të turpshme ndaj flotës ruse të Detit të Zi.

Por përdorimi i bombarduesve Tupolev dhe avionëve luftarakë MiG mund të jetë gjithashtu një mesazh për ushtrinë e Ukrainës se forcat ajrore ruse kanë ende fuqi të konsiderueshme. 

Ukraina tha një javë më parë se kishte rrëzuar tre avionë rusë Su-34. 

Nuk kishte asnjë konfirmim rus, por ushtria e Ukrainës tha se kishte sjellë një pauzë në bombardimet ajrore dhe kjo tani ka rifilluar.