Kompanitë polake të transportit kanë rifilluar bllokadën e tyre të kalimit Yahodyn-Dorohusk në kufirin me Ukrainën, i cili u anulua një javë më parë.

”Në anën polake të kufirit, 1 800 kamionë janë bllokuar aktualisht në një radhë 48 kilometra të gjatë”, tha një zëdhënëse e policisë lokale.

Sipas drejtuesve të kamionëve, automjetet që transportojnë ndihma humanitare dhe mallra që prishen lejohen një herë në orë.

Bllokada e pikës kufitare Yahodyn-Dorohusk u hoq fillimisht më 11 dhjetor pas një ndërhyrjeje të kreut të administratës rajonale polake.

Megjithatë, kompanitë e transportit që atëherë kanë njoftuar se do të rifillonin më 18 dhjetor pasi kanë ndërmarrë veprime ligjore kundër një ndalimi të vendosur nga administrata rajonale dhe kanë fituar.

Bllokuar mbeten edhe pikat kufitare Hrebenne dhe Korczowa. Drejtuesit polakë të kamionëve po protestojnë kundër konkurrencës më të lirë nga Ukraina, të cilën ata e fajësojnë për rënien e biznesit të tyre.

Para fillimit të pushtimit rus të Ukrainës, vendi eksportonte një pjesë të madhe të mallrave të saj nga deti. Që nga fillimi i luftës, shumë nga eksportet e Ukrainës janë zhvendosur në transportin rrugor.

BE anuloi lejet e transportit të kërkuara më parë për trafikun e mallrave ukrainas.

Firmat polake të transportit po kërkojnë që autorizimet të rikthehen.

Përveç kësaj, sipërmarrësit polakë ankohen për diskriminim nga autoritetet ukrainase. Për t’u lejuar të eksportojnë mallra nga atje në Poloni, shoferët polakë të kamionëve duhet të regjistrohen në mënyrë elektronike. Kjo shpesh nënkupton një kohë pritjeje prej disa ditësh.

Një tjetër pikë kufitare në Medyka është bllokuar nga fermerët polakë që nga fundi i nëntorit. Ata kërkojnë subvencione shtetërore për blerjen e misrit dhe mbajtjen e kredive për likuiditet.