Reagime të forta në Turqi shkaktoi fotosesioni që një modele bëri nën instruksionet e regjisorit turk Bilal Kisa në xhaminë më të madhe dhe më të rëndësishme të Ankarasë .
Ajo që zemëroi turqit ishte veshja e modeles së re, e cila u konsiderua e papërshtatshme për një grua në një xhami .
Siç shihet në fotot e postuara në Instagram – por më vonë “të hequra” pas reagimit të ashpër – modelja ka veshur një bluzë të shkurtër që i ekspozon barkun, një shall të bardhë, një rruzare teksa pozon në xhaminë e Kocatepe.
Pas publikimit të fotove dhe reagimeve të shkaktuara, zyra e guvernatorit të Ankarasë, njoftoi dhe për një hetim: “Për fotot që duket se janë bërë në xhaminë e Kocatepe në qytetin tonë dhe kanë qarkulluar në rrjetet sociale, ka nisur një hetim gjyqësor dhe administrativ.'
Ndërsa në një postim në Instagram, regjisori Kisa shkruan:
“Më vjen keq kur shoh që puna që bëra në Kocatepe ishte aq larg qëllimit dhe hyri në rrugë të tjera. Edhe pse qëllimi im ishte të thyeja paragjykimet e atyre që nuk e duan xhaminë për të treguar se xhamia është një vend ku të gjithë gjejnë qetësi, jam i shqetësuar që edhe unë dhe familja ime akuzohen edhe për tradhti. I kërkoj falje kujtdo që kam lënduar apo keqkuptuar”.
© SYRI.net