Niamey, Niger  - Vendet e Afrikës Perëndimore u kanë dhënë liderëve të grushtit të shtetit të Nigerit një javë kohë për të rikthyer në post Presidentin e zgjedhur në mënyrë demokratike të vendit dhe kanë kërcënuar se do të përdorin forcën nëse kërkesat nuk plotësohen.

Njoftimi erdhi në fund të një takimi urgjent të vendeve të Afrikës Perëndimore të dielën në Nigeri, ku blloku rajonal, i njohur si ECOËAS, u mblodh për t'iu përgjigjur marrjes së kontrollit të pushtetit në vend nga ushtria  javën e kaluar. Presidenti Mohamed Bazoum mbetet në arrest shtëpiak dhe ende nuk ka dhënë dorëheqjen.

“Në rast se kërkesat e autoritetit nuk plotësohen brenda një jave, (blloku do të marrë të gjitha masat e nevojshme për të rivendosur rendin kushtetues në Republikën e Nigerit. Masa të tilla mund të përfshijnë përdorimin e forcës”, thuhet në deklaratë.

Blloku vendosi gjithashtu sanksione të rrepta, duke përfshirë pezullimin e të gjitha transaksioneve tregtare dhe financiare midis shteteve anëtare të ECOËAS dhe Nigerit dhe ngrirjen e aseteve në bankat qendrore rajonale.

Sanksionet ekonomike mund të kenë një ndikim të thellë tek nigerianët, të cilët jetojnë në vendin e tretë më të varfër në botë, sipas të dhënave të fundit të KB. Vendi mbështetet në importet nga Nigeria për deri në 90% të fuqisë së tij, sipas Agjencisë Ndërkombëtare të Energjisë së Rinovueshme.

Sanksionet mund të jenë katastrofike dhe Nigeri duhet të gjejë një zgjidhje për t'i shmangur ato, tha kryeministri Ouhoumoudou Mahamadou për median franceze Radio France Internationale të dielën.

“Kur njerëzit thonë se ka një embargo, kufijtë tokësorë janë të mbyllur, kufijtë ajrorë janë të mbyllur, është jashtëzakonisht e vështirë për njerëzit... Nigeri është një vend që mbështetet shumë në komunitetin ndërkombëtar,” tha ai.

Blloku ECOWAS prej 15 vendesh është përpjekur pa sukses të rivendosë demokracitë në vendet ku ushtria mori pushtetin vitet e fundit. Katër kombe drejtohen nga qeveri ushtarake në Afrikën Perëndimore dhe Qendrore, ku ka pasur nëntë grusht shteti të suksesshëm ose tentativa që nga viti 2020.