Numri i vizitorëve në Akropol u rrit me 70 për qind muajin e kaluar, duke paralajëruar ç’mund të pritet këtë verë nëse turma nuk kontrollohet.

Akropoli nuk mund të mos ngjallë një ndjenjë habie te vizitorët. Por kur Caroline Kutek vizitoi vendin e njohur arkeologjik në Athinë kohët e fundit, ajo u përpoq t’i anashkalonte turmat.

"Pritja dhe numri i njerëzve që janë këtu janë padyshim dërrmues," tha operatorja 30-vjeçare e shërbimeve të klientit nga SHBA.

Ajo qëndroi para qindra njerëzve që rrinin në radhë në rrugën e përpjetë për në monumentin 2500-vjeçar, një pamje tepër e zakonshme.

Asistentja australiane e shitjeve Jackie Zachary pranoi se ajo nuk priste një vëllim kaq të madh turistësh në qershor dhe besonte se korriku do të ishte më i ngarkuar.

Sipas organizatës shtetërore greke për menaxhimin e burimeve kulturore (ODAP), Akropoli priti 14,000 vizitorë në maj, një rritje prej 70 për qind krahasuar me vitin 2022.

Kryetari i ODAP Ilias Patsarouhas vuri në dukje se vizitat ditore nga prilli e në vazhdim përputheshin me nivelet e parë të gushtit, tradicionalisht muaji më i ngarkuar për turizmin grek.

Pse Akropoli është kaq i ngarkuar me turistë?

Ndërsa bota sheh një ringjallje të kërkesës për udhëtime gjatë kohës së lirë, numri i turistëve në Greqi po i afrohet niveleve para pandemisë.

Kjo, së bashku me një fillim më të hershëm të sezonit turistik, e ka përkeqësuar situatën.

Edhe me një biletë "kalim i shpejtë" në internet, Kutek dhe familja e saj u desh të prisnin afërsisht 15 minuta për të hyrë.

Kutek e përshkroi majën e Akropolit si pjesën më të keqe, ku njerëzit duhej të kalonin në një rresht të vetëm, që çoi në ndarjen e grupeve.

Ëorld Heritage Ëatch, një organizatë joqeveritare që mbështet UNESCO-n, shprehu shqetësimin se Akropolit i mungojnë planet e menaxhimit të vizitorëve të kërkuara nga Konventa e OKB-së për Trashëgiminë Botërore, nënshkruese e së cilës është Greqia.

Stephan Doempke, kryetar i Ëorld Heritage Ëatch, e nënvizoi problemin e "mbi-turizmit" në vend, duke deklaruar se pa një plan menaxhimi dhe të kuptuarit se si të trajtohen turistët, Akropoli, një vend i rëndësishëm globalisht, është në rrezik.

Bllokimi në Propylaea, porta për në shenjtërore, bëhet herë pas here aq i vështirë sa që rojet e sigurisë duhet të ndërhyjnë, sipas Patsarouhas.

Situata përkeqësohet kur anijet turistike ankorohen në portin e Pireut, duke rezultuar në një fluks prej dy deri në tre mijë pasagjerë dhe pritje që i kalon një orë.

Ioannis Mavrikopoulos, një roje veterane në Akropolis, theksoi mungesën kronike të stafit në vendet arkeologjike në të gjithë vendin, veçanërisht në ishujt grekë ku kushtet përshkruhen si "dramatike".