Forcat ruse dhe ukrainase po luftojnë nëpër rrugët e Bakhmut - por Rusia nuk e ka nën kontroll qytetin lindor, tha nënkryetari i saj.

Oleksandr Marchenko tha gjithashtu për BBC se 4,000 civilët e mbetur po jetojnë në strehimore pa gaz, energji elektrike ose ujë.

Z. Marchenko tha se "asnjë ndërtesë e vetme" nuk kishte mbetur e paprekur dhe se qyteti është "pothuajse i shkatërruar".

Bakhmut ka parë shumë muaj luftimesh, ndërsa Rusia po përpiqet ta pushtojë.

Marrja e qytetit do të ishte një sukses i rrallë në fushën e betejës muajt e fundit për Rusinë.

Por pavarësisht kësaj, vlera strategjike e qytetit është vënë në pikëpyetje.

Pas bombardimeve të ashpra, forcat ruse dhe trupat nga ushtria private Ëagner duket se e kanë rrethuar pjesën më të madhe të Bakhmutit.

Të shtunën, shërbimi sekret ushtarak i Mbretërisë së Bashkuar tha se përparimet ruse në periferitë veriore e kanë bërë seksionin e qytetit të mbajtur nga Ukraina të cenueshëm ndaj sulmeve ruse nga tre anët.

Z. Marchenko akuzoi rusët se nuk kishin "asnjë synim" për të shpëtuar qytetin, përveçse të kryenin "gjenocid mbi popullin ukrainas".

"Aktualisht nuk ka komunikim në qytet, kështu që ndërlidhja është ndërprerë, urat janë shkatërruar dhe taktikat që rusët po përdorin është taktika e tokës së djegur," tha zoti Marchenko për programin Today.

Në fillim të kësaj jave, Presidenti i Ukrainës Volodymyr Zelensky tha se situata në zonë po bëhej "gjithnjë e më e vështirë" - megjithëse ushtria ukrainase tha se kishte zmbrapsur sulme të shumta që nga e premtja.

Komandanti i forcave tokësore të Ukrainës, Gjeneral Kolonel Oleksandr Syrskyi, vizitoi forcat në Bakhmut të premten dhe u takua me komandantët lokalë.

"Unë besoj se ne nuk duhet t'i japim asnjë centimetër të tokës tonë armikut," tha zoti Marchenko. “Ne duhet të mbrojmë tokën tonë, duhet të mbrojmë njerëzit tanë dhe duhet të mbrojmë bizneset që janë në këtë tokë.

"Dhe arsyeja pse ne nuk duhet t'ua japim atë është sepse do të jetë shumë e vështirë për ta marrë përsëri, për të rimarrë kontrollin pasi rusët ta kapin atë."

Të premten, presidenti Zelensky theksoi se duheshin artileri dhe predha për të "ndaluar Rusinë".

Sekretari amerikan i Shtetit, Antony Blinken tha se paketa më e fundit e vendit përfshin raketa artilerie Himars me precizion të lartë dhe obusë.