Franca do të ndalojë paketimin plastik pothuajse për të gjitha frutat dhe perimet nga janari i 2022 në një përpjekje për të zvogëluar mbeturinat plastike, tha të hënën ministria e Mjedisit.

Duke zbatuar një ligj të shkurtit 2020, qeveria publikoi një listë me rreth 30 fruta dhe perime që do të duhet të shiten pa paketim plastik nga 1 janari. Lista përfshin presh, patëllxhanë, domate, mollë, banane dhe portokall.

"Ne përdorim një sasi skandaloze të plastikës njëpërdorimshme në jetën tonë të përditshme. Ligji për ekonominë synon të zvogëlojë përdorimin e plastikës së hedhur dhe të nxisë zëvendësimin e saj nga materiale të tjera ose paketime të ripërdorshme dhe të riciklueshme," tha ministria në një deklaratë.

Është vlerësuar se 37% e frutave dhe perimeve shiten me paketim dhe pritet që masa do të parandalojë më shumë se një miliard artikuj plastikë të padobishëm në vit.

Presidenti i federatës franceze të shitësve të frutave Francois Roch tha se kalimi në karton do të jetë i vështirë në një kohë kaq të shkurtër.

"Gjithashtu, shitja e prodhimeve të lirshme është e ndërlikuar pasi shumë klientë prekin frutin dhe njerëzit nuk duan që frutat e tyre të preken nga klientët e tjerë," tha ajo.

Ndalimi i paketimit është pjesë e një programi qeveritar shumëvjeçar për të hequr gradualisht plastikën. 

Frutat e prera dhe një numër i kufizuar i frutave dhe perimeve delikate ende mund të shiten me paketim plastik, por ato do të hiqen gradualisht deri në fund të qershorit 2026.

Paketimet plastike do të ndalohen deri në fund të qershorit 2023 për domate, qershi, fasule jeshile dhe pjeshkë, dhe deri në fund të vitit 2024 për antiva, asparagus, kërpudha, disa sallata dhe barishte, si dhe qershi.

Në fund të qershorit 2026, mjedrat, luleshtrydhet dhe manaferrat e tjera fruta delikate duhet të shiten pa plastikë.

Nga viti 2022, hapësirat publike duhet të sigurojnë burime uji për të zvogëluar përdorimin e shisheve plastike; botimet e shtypit dhe publicitetit duhet të dërgohen pa mbështjellës plastik, ndërsa restorantet e ushqimit të shpejtë nuk mund të ofrojnë më lodra plastike falas.