'Shpërthimi në ‘Violanta'/ Dëshmitë e të mbijetuarve: Rrjedhja e gazit ishte denoncuar muaj para tragjedisë

Rrjedhja e gazit që shkaktoi shpërthimin tragjik të 26 janarit 2026 në fabrikën “Violanta” ishte konstatuar muaj përpara ngjarjes, por sipas dëshmive të punëtorëve, paralajmërimet nuk u morën seriozisht nga drejtuesit e kompanisë. Pesë punëtorë humbën jetën në shpërthimin që shkatërroi pothuajse plotësisht një pjesë të objektit, ndërsa dëshmitë e mbledhura nga autoritetet hedhin dritë mbi një histori të gjatë neglizhence dhe mungese masash sigurie.

Një punëtor 31-vjeçar, i punësuar prej vetëm dy muajsh në fabrikë, ka deklaruar se që në fillim të dhjetorit 2025 kishte nisur të ndiente një erë të pazakontë në ambientet e prodhimit, të cilën e krahasoi me erën e LPG-së në pikat e karburantit.

Sipas tij, shqetësimi ishte raportuar te përgjegjësit, por situata nuk ndryshoi.

Ai theksoi gjithashtu se gjatë kohës që punoi në fabrikë nuk kishte marrë asnjë trajnim për emergjencat, nuk i ishin shpjeguar planet e evakuimit dhe nuk dinte si të vepronte në rast zjarri. Para shpërthimit, ai nuk dëgjoi asnjë alarm paralajmërues.

LEXO EDHE: Shpërthimi në fabrikën ushqimore në Greqi, 3 gra humbin jetën! Shpëtojnë 5 të tjerë, 2 të zhdukur (VIDEO)

Një tjetër punëtor, me 28 vite eksperiencë në kompani, ku punonte edhe vajza e tij që humbi jetën në tragjedi, dëshmoi se era e gazit ishte raportuar disa herë te menaxherët e prodhimit.

Sipas tij, ishte thirrur një hidraulik, por ky i fundit kishte deklaruar se nuk kishte rrjedhje.

Ai shtoi se në Krahun B të fabrikës kishin ndodhur më parë incidente të vogla zjarri në furra, se kabllot elektrike në dysheme kishin shkaktuar goditje elektrike te punëtorët dhe se mirëmbajtja ishte e pamjaftueshme prej vitesh. Në ambientet e jashtme të kësaj pjese ndodheshin edhe dy rezervuarë të mëdhenj LPG.

Një punëtor 27-vjeçar, i cili ndodhej në turnin e natës, përshkroi momentin e shpërthimit rreth orës 04:00 të mëngjesit. Ai tha se dritat u fikën papritur dhe u dëgjua një zhurmë e fortë, e krahasueshme me shpërthimin e një granate.

Panele metalike dhe pjesë të ndërtesës fluturonin në ajër, ndërsa zjarri u përhap me shpejtësi. Ai arriti të dalë jashtë dhe njoftoi Policinë Kombëtare Greke, ndërkohë që nga brenda dëgjoheshin thirrje për ndihmë. Ndërtesa u përfshi pothuajse plotësisht nga flakët.

Dëshmitë tregojnë për një katastrofë të paralajmëruar, ku sinjalet e rrezikut ishin të pranishme për muaj me radhë, por nuk u trajtuan me seriozitetin e duhur.

Hetimet për përgjegjësitë penale dhe administrative vijojnë, ndërsa pesë jetë të humbura mbeten dëshmia më e rëndë e një tragjedie që, sipas gjithçkaje që ka dalë deri tani, mund të ishte shmangur./ Përgatiti: Syri.Net