Vuçiç: Serbia nuk ka ndërmend t’i bashkohet sanksioneve perëndimore ndaj Moskës
Serbia shpreson të forcojë bashkëpunimin me Rusinë dhe nuk ka plane t’i bashkohet sanksioneve të Perëndimit kundër Moskës, deklaroi të martën presidenti Aleksandar Vuçiç.
Si Vuçiç ashtu edhe presidenti rus Vladimir Putin po marrin pjesë në një samit rajonal për sigurinë në Pekin, përmes të cilit Kina synon të kundërshtojë ndikimin perëndimor në çështjet globale.
“Bashkëpunimi në nivelin më të lartë me Rusinë është shumë i rëndësishëm për Serbinë, veçanërisht në fushën e energjisë dhe furnizimeve me gaz rus,” tha Vuçiç në fillimin e transmetuar në televizion të takimit me Putinin.
Serbia synon të anëtarësohet në Bashkimin Evropian, por Rusia – një aleate tradicionale sllave dhe ortodokse – mbetet furnizuesja më e madhe e gazit për vendin. Ndjenjat pro-ruse janë gjithashtu të fuqishme në këtë shtet ballkanik.
Kompania ruse Gazprom dhe Gazpromneft zotërojnë kompaninë serbe të naftës NIS, e cila operon të vetmen rafineri të naftës në vend.
“Blerja e gazit është shumë e rëndësishme për ne,” i tha Vuçiç Putinit. “Jam i sigurt që mund të rrisim dhe forcojmë bashkëpunimin dypalësh.”
LEXO EDHE: 'Eshtë jetike...' Vuçiç në Pekin, i lutet Putinit për më shumë gaz dhe me çmim më të ulët
“Ruajtja e neutralitetit”
Serbia ka dënuar vazhdimisht pushtimin rus të Ukrainës në vitin 2022. Vuçiç është takuar gjithashtu me presidentin ukrainas Volodymyr Zelenskyy të paktën katër herë.
Megjithatë, Beogradi ka refuzuar deri tani t’i bashkohet sanksioneve perëndimore ndaj Moskës dhe Vuçiç ka deklaruar se Serbia do të mbetet neutrale.
“Që nga fillimi i krizës në Ukrainë, Serbia ka qenë në një situatë shumë të vështirë dhe nën presion të madh, por... ne do ta ruajmë neutralitetin tonë,” u shpreh ai.
Marrëdhëniet mes Beogradit dhe Moskës janë ftohur muajt e fundit, pasi agjencia ruse e inteligjencës së jashtme SVR ka akuzuar dy herë Serbinë për shitjen e municioneve artilerike në Ukrainë përmes ndërmjetësve në Europën Lindore.
Megjithatë, Moska ka shprehur mbështetje të hapur për Vuçiçin ndërsa ai përpiqet të përballet me protestat kundër korrupsionit që kanë nisur para dhjetë muajsh.