Nga aventurat e “Toy Story” te veprimet e Tedit si djalosh, kukullat dhe arinjtë e mbushur me pelush që vijnë në jetë, janë një klishe e vjetër kinemaje.

Dhe ndërsa përparimet e fundit me inteligjencën artificiale i kanë bërë të mundur lodrat në dukje të ndjeshme, këto duket se kanë më shumë të përbashkëta me figura të liga si klouni në Poltergeist dhe Çaki i Child's Play, sesa me Woody-n dhe Buzz Lightyear-in.

Lodrat e bazuara në inteligjencë artificiale u thonë gjëra të papërshtatshme fëmijëve dhe shkelin privatësinë e një shtëpie përmes mbledhjes së gjerë të të dhënave, sipas Common Sense Media, një organ mbikëqyrës i mallrave elektronike të konsumit me seli në SHBA.

“Vlerësimi ynë i rrezikut zbuloi se shoqëruesit e lodrave me inteligjencë artificiale ndajnë probleme themelore, që i bëjnë ato të papërshtatshme për fëmijët e vegjël”, thotë Robbie Torney, kreu i vlerësimeve digjitale të Common Sense. 

"Më shumë se një e katërta e rezultateve përfshinin përmbajtje të papërshtatshme, të tilla si përmendje të vetëlëndimit, drogës dhe sjelljeve të rrezikshme", paralajmëron Torney, duke theksuar se pajisje të tilla përfshijnë "mbledhje të gjerë të të dhënave" dhe bazohen në "modele abonimi që shfrytëzojnë lidhjet emocionale".

Disa nga lodrat përdorin “mekanizma lidhjeje për të krijuar marrëdhënie të ngjashme me ato të shoqëruesve”, sipas Common Sense, e cila paralajmëron se pajisjet në të njëjtën kohë “mbledhin të dhëna të gjera në hapësirat private të fëmijëve”, duke përfshirë regjistrime zanore, transkripte dhe “të dhëna sjelljeje”.

Common Sense thotë se asnjë fëmijë nën 5 vjeç nuk duhet të jetë pranë një lodre me inteligjencë artificiale, dhe se prindërit duhet të jenë të kujdesshëm kur bëhet fjalë për fëmijë të moshës 6 deri në 12 vjeç.

«Ende na mungojnë mbrojtje domethënëse për fëmijët, në lidhje me inteligjencën artificiale», thotë themeluesi dhe shefi i Common Sense, James Steyer, duke e krahasuar mungesën e mbrojtjeve me testet “rigoroze” të sigurisë dhe përshtatshmërisë që u nënshtrohen lodrave të tjera përpara se të miratohen për shitje./ DPA News.