StudimI tronditës: 1 në 5 të rinj në Spanjë kanë parë foto nudo të falsifikuara nga inteligjenca artificiale

Një studim i ri i organizatës “Save the Children” zbulon se pothuajse të gjithë të rinjtë në Spanjë kanë qenë viktima të ndonjë forme abuzimi seksual në internet para se të mbushnin 18 vjeç.

Sipas raportit, i cili bazohet në një anketë me më shumë se 1,000 të rinj të moshës 18-21 vjeç, 97% e tyre kanë përjetuar sjellje abuzive dixhitale, duke përfshirë kontaktet me të rritur për qëllime seksuale dhe presione për të ndarë përmbajtje intime.

Një nga gjetjet më alarmante të raportit është se një në pesë të rinj thonë se imazhe nudo të rreme të tyre janë krijuar përmes inteligjencës artificiale dhe janë përhapur në internet pa pëlqimin e tyre, ndërkohë që ishin ende të mitur. Save the Children paralajmëron se këto raste përfaqësojnë vetëm “majen e ajsbergut”, pasi shumë forma të dhunës nuk raportohen dhe janë të vështira për t’u identifikuar në mjedisin dixhital.

Një rast i fundit në Alicante tregon seriozitetin e fenomenit, ku një vajzë 12-vjeçare u kërcënua me publikimin e imazheve nudo të gjeneruara nga IA nëse nuk dërgonte një video me përmbajtje seksuale. Edhe pse vajza nuk kishte ndarë asnjëherë përmbajtje intime, ajo ndjeu faj për situatën, theksoi një edukator i organizatës që trajtoi rastin.

Raporti ngre alarmin për normalizimin e dërgimit të përmbajtjeve seksuale mes adoleshentëve. Pothuajse gjysma e të rinjve të pyetur nuk e konsiderojnë të rrezikshme ndarjen e imazheve intime dhe shpesh e bëjnë këtë me shpresën për vëmendje, dashuri apo përfitime të tjera. Vetëm një pjesë e vogël e tyre është e vetëdijshme për rreziqet që mbart kontakti me të huaj apo shpërndarja e përmbajtjes personale.

Drejtoresha për ndikimin dhe zhvillimin territorial të Save the Children, Catalina Perazzo, theksoi se përhapja e imazheve intime është e pakontrollueshme dhe shpesh çon në shantazh apo forma të tjera të viktimizimit. Ajo nënvizoi nevojën urgjente për ligje më të forta dhe edukim dixhital që të parandalojë abuzimin seksual në internet ndaj fëmijëve dhe adoleshentëve./ Euronews - Syri.net