Mjekët paralajmërojnë prindërit, fëmijët e të cilëve flenë pak ose keq

20:52, 07/08/2022

Mjekët paralajmërojnë prindërit se fëmijët që flenë më pak se nëntë orë mund të kenë probleme me kujtesën dhe inteligjencën.

Ekspertët nga Shkolla e Mjekësisë e Universitetit të Maryland-it thanë se mungesa e gjumit ose gjumi i dobët tek fëmijët mund të rrisë rrezikun e problemeve të tilla si ankthi, sjellja impulsive dhe depresioni.

 

Ata vunë re gjithashtu se tek fëmijët që nuk dremisin gjatë ditës, ka një lidhje me vështirësitë njohëse si kujtesa, zgjidhja e problemeve dhe vendimmarrja.

“Ne zbuluam se fëmijët që flinin më pak se nëntë orë në natë kishin më pak lëndë gri ose më pak vëllim në zona të caktuara të trurit përgjegjës për kontrollin e vëmendjes, kujtesës dhe frenimit në krahasim me ata me zakone të shëndetshme të gjumit”, tha autori i studimit Dr. Ce. Wang.

Ai shtoi se “këto dallime ishin ende të dukshme pas dy vitesh, gjë që është një zbulim shqetësues që tregon për dëmtime afatgjata për fëmijët që nuk flenë mjaftueshëm”.

Studimi u botua në revistën "The Lancet Child & Adolescent Health" dhe shqyrtoi më shumë se 8,300 fëmijë të moshës 9 deri në 10 vjeç.

Mjekët ekzaminuan gjetjet e rezonancës magnetike, dokumentacionin mjekësor dhe pyetësorët e plotësuar nga prindërit për dy vjet.

“Studime të mëtejshme nevojiten për të konfirmuar gjetjet tona dhe për të parë nëse ndonjë ndërhyrje mund të përmirësojë zakonet e gjumit dhe të kthejë deficitet neurologjike”, tha Dr. Wang.

Për ta ndihmuar fëmijën tuaj të flejë, ekspertët nga Akademia Amerikane e Pediatrisë thonë se prindërit duhet të inkurajojnë zakonet e mira të gjumit tek fëmijët e tyre.

Kjo përfshin vendosjen e prioriteteve për të gjithë familjen dhe respektimin e një rutine të rregullt. Ata gjithashtu theksojnë se prindërit duhet të kufizojnë sasinë e kohës që fëmija i tyre kalon para ekranit dhe të eliminojnë plotësisht qëndrimin ulur para ekranit një orë para gjumit.

Sipas udhëzimeve të “Sleep.org”, foshnjat e porsalindura deri në tre muaj duhet të flenë 14 deri në 17 orë, ndërsa foshnjat deri në vitin e parë nga 12 deri në 15 orë. Fëmijët e vegjël kanë nevojë për 11 deri në 14 orë gjumë, dhe parashkollorët 10 deri në 13 orë. Fëmijët deri në moshën 13 vjeçare duhet të flenë nga nëntë deri në 11 orë, ndërsa adoleshentët nga tetë deri në 10 orë, transmeton Index.hr.

© SYRI.net

Lexo edhe:

• Faktorët kryesorë që ndikojnë në shëndetin mendor të adoleshentëve
• Një tjetër pandemi po vjen pas 'COVID-19'? OBSH ngre alarmin për H5N1
• ‘I nxehti ekstrem shkakton stres’, studimi: Ngrohja globale po shton rastet e sëmundjeve kardiovaskulare