Pyeti lojtarin serb për provokimin ndaj Kosovës, flet gazetari anglez që bëri bujë në gjithë Shqipërinë

11:10, 27/11/2022

Një incident i rëndë ndodhi në Kupën e Botës në Katar. Në dhomat e zhveshjes së Serbisë përpara ndeshjes me Brazilin, u shpalos flamuri me hartën e Kosovës, i cili shoqërohej me mesazhin: “Nuk dorëzohemi”. Ka pasur reagime të shumta në rrjetet sociale në lidhje me këtë gjest të lojtarëve serb, i cili u cilësua si gjenocidial.

Faqja “Kosovo Football” iu drejtua FIFA-s me fjalët se “Serbia fjalë për fjalë po bën thirrje për gjenocid gjatë Kupës së Botës”, ndërsa  Ministri i Kulturës, Rinisë dhe Sportit i Kosovës Hajrulah Çeku u ankua në FIFA për këtë flamur dhe u shpresa se Kupa e Botës është përdorur për të promovuar “mesazhe ksenofobike, gjenocidale dhe urrejtjeje ndaj Kosovës”. Por gjithçka nuk është mbyllur me kaq, pasi gazetari britanik, Neil Barker pyeti lojtarin Marko Grujic në lidhje me këtë gjest, por zyrtari i Serbisë ka ndërhyrë për të thënë se vëmendja duhet të jetë vetëm te sporti. Paradoksale, duke ditur se po ata vendosën të përfshinin politikën në sport.

Gazetari britanik ka folur në një lidhje direkte nga Katari me emisionin “Botërori Katar 2022“ në “Ora TV“, ku ka treguar më tepër rreth këtij episodi. Barker ka kujtuar edhe atë ndeshje në Rusi 2018 mes Serbisë dhe Zvicrës, kur Xhaka dhe Shaqiri u dënuan për bërjen e simbolit të shqiponjës pas golave të shënuar. Barker është shprehur se ndeshja e radhës mes këtyre dy Kombëtareve do të jetë shumë emocionale për dy lojtarët me origjinë shqiptare.

“Sapo kam dalë nga stadiumi “Lusail“. Disa ndeshje kanë qenë më të mirat. Tifozët latinë po sjellin shumë zhurmë. Sot ishte atmosfera më e mirë. Mesi shënoi. Shkova në konferencën për shtyp sepse i mbulojmë të gjitha skuadrat këtu, përfshirë Serbinë. Ishte radha ime për të shkuar te Serbia. Kështu që shkova për t’i pyetur në lidhje me të. Kisha parë flamurin në dhomat e zhveshjes, kështu që doja t’i pyesja në lidhje me këtë. Pyeta lojtarin në fillim, sepse e dija që ai fliste anglisht. Por ndërhyri zyrtari që më tha se do të flisnim vetëm për futboll.

Serbi-Zvicër? Do të jetë një ndeshje magjepsëse. Në ndeshjen e fundit patëm shqiponjën dykrenare të Xhakës dhe Shaqirit, kur mundën serbët. U dënuan për atë gjest. Mbase e kanë parë atë flamur, mbase e kanë parë që FIFA ka çelur një hetim dhe jam shumë i sigurt që do të jetë shumë emocionale për këta dy lojtarë.

Nuk ka shumë anglezë këtu. Nuk kanë të njëjtën atmosferë si argjentinasit, meksikanët, marokenët apo tunizianët. Nuk mund të pish birrë në stadium, por tifozët britanikë kanë gjetur disa bare ku mund të blejnë. Por është shumë shtrenjtë, kushton rreth 12 paund. Ka shumë tifozë të Uellsit. Nuk ka pasur probleme në stadium. Ka shumë forca sigurie. Kanë kontroll të rreptë për veshjen, pijet, nuk lejojnë flamuj me ngjyrat e ylberit. Stadiumet janë të klasit botëror. Duken të mrekullueshëm. Por duhet të kujtojmë se si janë ndërtuar”, është shprehur Neil Barker.

© SYRI.net

Lexo edhe:

• Distria kampione e vërtetë – Shkon në finale të Evropianit
• Distria Krasniqi merr dy fitore dhe kualifikohet në gjysmëfinale të Kampionatit Evropian
• Al Khelaifi: Superliga? T’i japin fund kësaj ideje idiote