“Fitore për futbollin francez” – tifozët në tribuna po i shijojnë miqësoret

“Fitore për futbollin francez” – tifozët në tribuna po i shijojnë miqësoret

10:29, 14/07/2020

Paris Saint-Germaini e shpartalloi ekipin e divizionit të dytë, Le Havren, në miqësoren e luajtur të dielën që ishte e jashtëzakonshme, jo për shkak të rezultatit 9:0, por sepse tërhoqi turmën më të madhe të shikuesve në tribuna për një ndeshje futbolli në njërën prej pesë ligave të forta të Evropës që nga fillimi i marsit.

Qeveria franceze zbuti protokollet shëndetësore para fundjavës së shkuar për të lejuar një pjesëmarrje totale prej pesë mijë personash, përfshirë lojtarët, gazetarët dhe stafin nëpër ndeshje. Në fakt, miqësorja në Le Havre nuk ishte e para që u luajt, por të tjerat kanë përfshirë vetëm ekipe të divizioneve të ulëta. Kështu që, për ndeshjen në Le Havre ku do të luante PSG-ja, biletat që kishin çmimin prej 30 deri në 60 euro, janë shitur brenda gjashtë minutave, shkruan AFP.

“Është një fitore për futbollin francez, për sportin në përgjithësi”, tha ministrja e Sportit të Francës në largim, Roxana Maracineanu, që ishte e pranishme në ndeshje. “Jam shumë e kënaqur që futbolli në Francë rifilloi në mënyrë të popullarizuar, me shumë njerëz në stadiume. Jemi vendi i vetëm në Evropën Perëndimore që e kemi bërë një gjë të tillë. Është triumf i madh ndaj situatës aktuale”.

Për dallim nga Gjermania, Anglia, Italia dhe Spanja, Franca e anuloi tërësisht edicionin 2019/20 për shkak të përhapjes së pandemisë së koronavirusit.

Por, katër vendet e tjera rifilluan me gara pas një pauze prej tre muajve, por këtë gjë e bënë prapa dyerve të mbyllura. Megjithëse rregullat e distancës sociale ishin në vend, tifozët që ishin të pranishëm në stadiumin “Stade Ocean” të Le Havres, ishin paksa më të liruar në këtë aspekt.

“Është pak a shumë si kthim në jetën normale, edhe pse ende ekzistojnë disa kushte drastike. Neve nuk na interesoi aspak humbja e thellë nga PSG-ja, pasi kjo ndeshje para së gjithash ishte një mënyrë e rikthimit të futbollit në mënyrë triumfale në Francë që nga muaji mars”, ka insistuar Johan Vattier, kreu i “Les Barbarians Havre”, grupit më të madh të tifozëve të klubit Le Havre. “Nuk është e lehtë për një grup si i yni t’i zbatojmë rregullat, sepse jemi mësuar që të jemi bashkë. Por, ne do të përpiqemi t’i respektojmë sa më shumë që të jetë e mundur. Ne duam që sezoni i ri të fillojë me praninë e tifozëve në tribuna”.

© SYRI.net

Lexo edhe:

Bëje LIKE dhe merr lajmin e fundit nga Sporti:

Komentet

Shto koment

>
Denonco