Grenell në Prishtinë brenda javës/ Zyra e diplomatit konfirmon datën

20:39, 21/01/2020

Angazhimi serioz i emisar special të presidentit amerikan Donald Trump, Richard Grenell,  për dialogun Kosovë – Serbi, ka nisur të jap frytet e para.

Pas marrëveshjes së fluturimit Prishtinë – Beograd, këtë javë, zyra e  diplomatit amerikan konfirmon se Grenell do të qëndrojë në Kosovë.

Akoma nuk dihet se cilat janë planet e ambasadorit, që Trump e falënderoi marrëveshjen e fundit.

Por njeriut që iu dhanë meritat për arritjen e marrëveshjes së quajtur historike për linjë të fluturimit Prishtinë – Serbi, do të vijë këtë javë në Kosovë.

Sipas zëdhënësit të Zyrës së Grenellit në Berlin është konfirmuar se diplomati do ta vizitojë Kosovën të enjten më 23 janar, por nuk ka dhënë më shumë detaje se për ç’ka saktësisht Grenell do të vijë në Kosovë.

Në Prishtinë, Shtetet e Bashkuara të Amerikan kanë disa kërkesa së fundmi.

Rinisja e dialogut është një nga kërkesat. Ndërkaq, akoma nuk është formuar Qeveria, e ambasadori amerikan, Philip Kosnett, shkon rregullisht në zyrat e Vetëvendosjes e LDK-së. Edhe kreu i LDK-së, Isa Mustafa, sot pranoi se ndërkombëtarët po bëjnë presion për formimin sa më të shpejtë të Qeverisë.

Grenell nga ana tjetër në Gjermani ka takuar tre prej zyrtarëve të lartë të LDK-së, Agim Veliun, Avdullah Hotin dhe Skender Hysenin. Atje kishin folur për formim të Qeverisë.

Diplomati amerikan e kishte paralajmëruar më parë një vizitë në Kosovë, por të njëjtën e kishte anuluar.

Ndërkaq Grenell këtë javë kurorëzoi një marrëveshje për linjë fluturimit Prishtinë – Beograd, të cilën do ta realizojë kompania gjermane Lufthansa.

“Të gjithë thanë se nuk do të bëhet. Por, për herë të parë në një gjeneratë do të këtë linja direkte ajrore në mes të Serbisë dhe Kosovës. Një tjetër fitore. Faleminderit për @WHNSC,  ambasador Robert O’Brien dhe ambasador @RichardGrenell!”, ka shkruar Trump në Twitter.

Lajmi për hapjen e linjës ajrore Prishtinë – Beograd është bërë në kryeqytetin gjerman ku janë duke qëndruar zyrtarë të lartë të administratës amerikane në Konferencën për Libinë, përfshirë Sekretarin e Shtetit Mike Pompeo dhe këshilltarin për Siguri Kombëtare të Presidentit Trump, Robert O’Brien.

 

© SYRI.net

Lexo edhe:

• Tetë mjekë dhe dy profesorë s’e kanë deklaruar fare pasurinë, ja lista ​
• ​Interpoli lëshon fletarrest për Milan Radojçiqin
• Dedaj merret në pyetje nga mbrojtja për një konferencë ku ai thotë se “UÇK-ja ishte në mbrojtje të pragut të shtëpisë”