Nga Syri.net Kosova - 14:05, 21/01/2020
Gati një dekadë e gjysëm pas ndarjes nga jeta të liderit të saj historik, Lidhja Demokratike ende e ka të vështirë të këndellet.
Pa presidentin Ibrahim Rugova, LDK-ja nuk arriti të dilte më partia e parë në Kosovë në këto 14 vjet, që u dominuan nga rivalja e saj, PDK-ja.
Aq e rëndë rezultoi kjo vdekje, saqë në këtë periudhë një tjetër Lëvizje u konsolidua nga zeroja dhe arriti t’i fitonte zgjedhjet vitin e kaluar.
Për LDK-në, sa më tepër zhvishej nga të qenit lëvizje, aq më të mëdha ishin kostot politike. Të përçarë e të tronditur, shpëtimin e vetëm herë pas here e kishin rugovizmin.
Pak rëndësi sa e kishin seriozisht, sepse ajo që vlente ishte të kapeshin dikund, te një ideal, simbol apo qoftë edhe mit, siç e kishin shndërruar liderin më të madh që ka nxjerrë Kosova.
Fatmir Sejdiu dhe Isa Mustafa ishin liderë pragmatikë, sidomos ky i dyti, i cili për herë të parë pas luftës e bëri LDK-në me kryeministër. Në fakt, e bëri veten.
Në këtë përvjetor të vdekjes së Rugovës, LDK-ja që dikur presidenti e udhëhiqte drejt fitoreve bindëse , po hamendet ta nxjerrë në opozitë partinë e Hashim Thaçit e Kadri Veselit.
Sa ishte gjallë Rugova, Thaçi nuk bëhej dot kryeministër. Bëhej Bajram Rexhepi, Ramush Haradinaj, Bajram Kosumi, Agim Çeku, por jo “Gjarpri”. Me gjasë, Ibrahim Rugova, e parandjente se çfarë dëmesh mund t’i shkaktoheshin Kosovës me një kryeministër si Thaçi.
Ardhja në pushtet e këtij të fundit, pasi nuk e kishte më përballë liderin që i shkaktonte humbje rregullisht, e konfirmoi qëndrimin e Rugovës.
Pavarësia u shpall, por regjimi që instaloi Thaçi&CO, e rrënoi në themele shtetin e sapokrijuar. Fasada dukej demokratike, por brenda vlonte mafia politike, qeverisja despotike, korrupsioni masiv.
Në shtetin e kapur, me aq sa mundi, u kacavjerr edhe LDK-ja, derisa njeriu që e bënë president, i tradhtoi dhe e shkarkoi Isa Mustafën.
Nuk ka shumë çka të mendohet Lidhja Demokratike për koalicionin me Vetëvendosjen, sepse refuzimi do të çonte ujë në mullirin e PDK-së, të Thaçit e Veselit. Një dështim i mundshëm, do ta rikthente PAN-in në pushtet.
Në këtë përvjetor, le të kujtohet Rugova, për aftësinë e tij që të tejkalojë kriza e të ofrojë partneritet për shtetin.
Po e humbën këtë shans, LDK-ja, mund të përballet me pasoja të rënda politike.
Është momenti që kjo parti, ta gjejë më në fund filozofinë e vet të veprimit, duke mos e harruar atë rugoviane, të cilën sa herë nuk kanë ide se çfarë të bëjnë, e përdorin si alibi para votuesve.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
