Më 15 qershor 2014 në Rahovec u vra Elvis Pista, një funksionar lokal i PDK-së.
Para se të vritej ai punoi në atë që quhet Posta dhe Telekomi i Kosovës ose – më saktë - një ndërmarrje shtetërore në shërbim të partive që sunduan dhe plaçkitën Kosovën për 20 vjet.
Vrasësit e Pistës nuk janë zbuluar kurrë. Partia e tij ka qenë në pushtet. Ka kontrolluar gjithçka. Polici e shërbim sekret (zyrtar dhe partiak).
Krerët e PDK-së menjëherë pas vrasjes vrapuan në Rahovec dhe thanë se partia nuk do të lë “gur e dru’” pa lëvizur që vrasësit të zbulohen. Mirë shumë. A u zbuluan? Kurrë.
Në Facebook paska mbetur një faqe me titullin “R.I.P. Elvis Pista”. Më 23 maj 2020 portali kallxo.com botoi një shkrim me këtë titull: “Gjashtë vjet pas, vrasja e Elvis Pistës mbetet mister për Prokurorinë”.
Ish-kandidati i PDK-së për deputet në Kuvendin e Kosovës ishte vrarë në oborrin e një restoranti në Rahovec.
Prokuroria e Gjakovës ka njoftuar se janë intervistuar 90 dëshmitarë. Dhe? Asgjë. Vrasësit në liri.
Partia e Elvis Pistës po thotë se është reformuar. Nëse me reformë nënkuptohet ruajtja e trashëgimisë së errët, atëherë, po, vërtet janë reformuar.
Kur kanë kërkuar së fundi ndriçimin e këtij atentati? Këtij tmerri.
Ah, po, në google gjendet edhe një këngë e një turbofolk-lahutari vajtimtar për Elvis Pistën.
Se kështu shkojnë këto punë në Kosovë. Vritet një politikan, shokët e partisë shprehin keqardhje, premtojnë se do t’i kapin vrasësit – dhe gjithçka mbaron me një këngë.
Ose me keqpërdorim të viktimës për poenë politikë dhe vota. Ndoshta ndokujt mund t’i prishet qejfi nëse këtu flasim edhe për vrasjen e Haki Imerit në Drenicë. Faji i tij?
Nuk përkrahte banditët, kriminelët, hajdutët, cubat që Kosovën e shihnin si gurthyes që duhet gërryer, plaçkitur dhe djegur.
© SYRI.net