Panairi i parë ndërkombëtar i verës “Wine Vision by Open Balkan” do të mbahet në Beograd nga 1 deri më 4 shtator 2022, i cili organizohet nën kujdesin e qeverive të Serbisë, Maqedonisë së Veriut dhe Shqipërisë, si pjesë e “Ballkanit të Hapur.
Ky panair do të hapet në ditën e njejtë kur Kosova do të fillojë të aplikojë masa të reciprocitetit me Serbinë lidhur me targat e veturave dhe dokumentet e identifikimit për qytetarët serbë që hyjnë në Kosovë. Masa e reciprocitetit për dokumentet e identifikimit ishte vendosur të fillohej më 1 gusht, por ajo u shty për 1 shtator pas tensioneve në veri të Kosovës, pasi qytetarët serb atje, vendosën barrikada në rrugë. Nuk dihet ende, nëse Kosova dhe Serbia do të arrijnë ndonjë marrëveshje për këto dy tema, para datës 1 shtator. Nëse kjo nuk arrihet, atëherë rrezikohet që sërish të ketë tensione në pjesën veriore të Kosovës të banuar me shumicë serbe. Pra nëse përsëritet situata e 31 korrikut, edhe panairi i Beogradit në kuadër të Open Balkan, pritet të mbetet nën hijen e tensioneve Kosovë-Serbi.
Panairi “Wine Vision by Open Balkas”, raportohet se do të mbledhë mjeshtrit në prodhimin e verërave më të mira në një vend dhe do të promovojë Ballkanin si destinacion turistik, gjeografinë e tij dhe pasurinë e varieteteve të verërave.
Mbi 332 ekspozues nga 22 vende pritet të marrin pjesë në aktivitetin e përmendur në Panairin e Beogradit. Nga Serbia do të prezantojnë 160 ekspozues, 26 nga Shqipëria, ndërsa 47 ekspozues nga Maqedonia e Veriut. Përveç shteteve anëtare të Open Balkan, ekspozues priten edhe nga Kroacia, Mali i Zi, Franca, Kili, Argjentina, Italia, Bosnja dhe Hercegovina dhe vende të tjera.
“Wine Vision by Open Balkan” do të hapet zyrtarisht më 1 shtator nga Presidenti i Republikës së Serbisë, Aleksandar Vuçiq dhe kryeministrat e Maqedonisë së Veriut dhe Shqipërisë, Dimitar Kovacevski dhe Edi Rama, si dhe samiti i lidershipit është planifikuar për 2 shtator.
Gjatë Panairit, vizitorët do të kenë mundësinë të vizitojnë salla të ndryshme të përcaktuara tematikisht dhe do të mund të edukohen dhe të mësojnë gjithçka që duan të dinë për historinë dhe origjinën e verës, procesin e prodhimit, llojet e verës, konsumin dhe shijen dhe mund të blejnë disa nga verërat më të mira të rajonit të Ballkanit dhe botës.
Një pjesë integrale e “Vizioni i Verës së Ballkanit të Hapur” do të jenë takimet e biznesit të ekspozuesve të verës, përfaqësuesve të zinxhirëve kryesorë tregtarë dhe përfaqësuesve të industrisë HORECA. Do të jetë gjithashtu një mundësi për të gjithë ekspozuesit që të rrisin më tej bashkëpunimin, të lidhin verërat rajonale dhe industritë e lidhura me to, dhe të forcojnë partneritetet dhe kontaktet e biznesit. Gjithashtu, gjatë Vizionit të Verës së Ballkanit të Hapur do të mbahet edhe Panairi i Ushqimit ku do të prezantohen të gjitha specialitetet gastronomike më të njohura nga kjo pjesë e Evropës.
Gjatë aktivitetit katërditor do të organizohet një vlerësim ndërkombëtar i verës “Open Balkan Wine Trophy”. Verërat do të vlerësohen nga 25 gjyqtarë ndërkombëtarë të verërave nga e gjithë bota, e në mesin e tyre do të jenë edhe pesë mbajtës të titullit “Mjeshtër i verës”, që është titulli më prestigjioz në botën e verës.
“Ballkani i Hapur” është një iniciativë ekonomike dhe politike e bazuar në vlerat e Bashkimit Evropian, në të cilin janë anëtare tre shtete – Shqipëria, Maqedonia e Veriut dhe Serbia. Ideja e kësaj nisme është të ofrojë mundësi më të mëdha dhe më të mira për tregti, shkëmbim punëtorësh, studentësh dhe njohurish, si dhe inkurajimin e integrimit të mëtejshëm në BE, duke promovuar kulturën dhe traditat e pasura të të tre vendeve.
Megjithatë, Kosova ka refuzuar të bëhet pjesë e kësaj nisme duke mos pranuar të marrë pjesë as në cilësinë e vendit vëzhgues, siç bënë Mali i Zi dhe Bosnje e Hecergovina në samitin e fundit të mbajtur në Maqedoninë e Veriut.
© SYRI.net
Stano: Për masat e Kosovës vendos Këshilli i Ministrave në bazë të raportit të Borrellit
Të shtëna me armë zjarri në Hajvali
Pezullimi nga puna i profesorit pas akuzave për ngacmim seksual, Nagavci e mirëpret vendimin e Rektorit
Denonco
Merrni lajmet më të fundit nga SYRI.net në çdo moment dhe kudo që të jeni!
