Dy të tretat e gjermanëve po shpenzojnë më pak për shkak të inflacionit rekord

17:26, 24/11/2022

Pothuajse dy të tretat e konsumatorëve në Gjermani po shpenzojnë më pak para për shkak të inflacionit rekord, njoftoi Shoqata e Zyrave Gjermane të Mbrojtjes së Konsumatorit (VZBV).

“Pothuajse dy të tretat e të anketuarve shpenzojnë më pak para për shkak të inflacionit dhe 20 për qind e tjerë besojnë se do t’u duhet të ulin shpenzimet në të ardhmen”, njoftoi presidentja e VZBV, Ramona Pop.

Shumica më e madhe, 61 për qind e tyre, kursejnë kur blejnë sende ushqimore dhe 56 për qind kursejnë kur blejnë rroba dhe këpucë. Për shkak të rritjes së çmimeve me pakicë, një e treta e të anketuarve përdorin më pak veturën e tyre. Një e treta e të anketuarve kanë deklaruar se po fluturojnë më pak për shkak të rritjes së çmimeve, raporton zdf.

Inflacioni në muajin tetor ishte 10.4 për qind, dhe inflacioni rekord është ndikuar më së shumti nga rritja e çmimeve të energjisë. Mesatarisht, çmimet ditore të ushqimeve u rritën me 20.3 për qind. Krahasuar me tetorin e vitit të kaluar, më së shumti u rritën vaji i ushqimit (49,7 për qind), produktet e qumështit dhe vezët (28,9 për qind), buka dhe drithërat (19,8 për qind).

Rritjen më të madhe të çmimeve në sektorin e energjisë e ka shënuar gazi natyror, i cili është 109.8 për qind më i shtrenjtë se në të njëjtën periudhë të vitit të kaluar. Karburanti për makina është mesatarisht 22.3 për qind më i shtrenjtë. Në të njëjtën kohë, sondazhi i VZBV tregoi se konsumatorët janë të gatshëm të ndryshojnë zakonet e tyre të blerjes nëse kjo do të kontribuonte në ngadalësimin e ndryshimeve klimatike.

Gjithashtu u tregua se 75 për qind e të anketuarve janë gati të veshin rrobat e tyre ekzistuese për më gjatë në vend që të blejnë të reja. 45 për qind e tyre thanë se do të hiqnin dorë nga blerja e pajisjeve të reja elektronike nëse të vjetrat mund të riparoheshin. 

 

© SYRI.net

Lexo edhe:

• Rajonet e varfëra do të preken më tepër, ndryshimet e klimës pritet të ulin ndjeshëm të ardhurat botërore
• FMN zvogëlon parashikimin për rritjen ekonomike të Shqipërisë në 2024
• Kursi zyrtar i këmbimit, 17 prill 2024